اسلام آباد۔17نومبر (اے پی پی):وزیر خارجہ مخدوم شاہ محمود قریشی نے کہا ہے کہ دنیا بھر میں عدم برداشت کے بڑھتے ہوئے رجحانات کے برعکس پاکستان میں اقلیتوں کے حقوق کے تحفظ اور معاشرے میں رواداری کو فروغ مل رہا ہے۔آئین پاکستان میں اقلیتوں کو برابر کے حقوق حاصل ہیں۔کرتار پور راہداری کھولنا ہم آہنگی اور پر امن بقائے باہمی کیلئے پاکستانی عزم کا عکاس ہے۔یہ بات انہوں نے منگل کو برداشت کےعالمی دن کے سلسلے میں وزارت خارجہ میں منعقدہ "موجودہ دور میں رواداری کی اہمیت” کے موضوع پر ایک مذاکرے سے خطاب کرتے ہوئے کہی۔وزیر خارجہ نے کہا کہ ایسے وقت میں جب بین الاقوامی سطح پر عدم رواداری کے رجحانات میں اضافہ ہو رہا ہے، پاکستانی پارلیمنٹ میں عیسائیوں ، ہندووں ، سکھوں اور دیگر اقلیتوں کی نمائندگی نے عالمی سطح پر رواداری کو فروغ دینے کے علاوہ پاکستان میں بین المذاہب ہم آہنگی اور بقائے باہمی کا پیغام دیا ہے۔انہوں نے کہا کہ بنیادی انسانی حقوق کی فراہمی سے انکار کی وجہ سے مسائل بڑھ رہے ہیں۔وقت کیساتھ جمہوری اقدار مضبوط ہو رہے ہیں۔تحمل اور برداشت کے فروغ کیلئے معاشرتی ہم آہنگی ضروری ہے۔وزیر خارجہ نے کہا کہ کووڈ 19 وبائی مرض کی موجودہ صورتحال میں جہاں لوگ پوری دنیا میں غیر محفوظ محسوس کررہے ہیں،اس مشکل وقت میں رواداری اور صبر و تحمل کا فروغ بہت ضروری تھا۔وزیر خارجہ نے پڑوسی ملک کی صورتحال کا حوالہ دیتے ہوئے کہا کہ وہاں عدم رواداری ، انتہا پسندی عروج پر ہے اور نئے امتیازی قوانین کے ذریعے اقلیتوں کے حقوق غصب کئے جا رہے ہیں۔
