لاہور۔6اکتوبر (اے پی پی):محکمہ زراعت پنجاب نے کہا ہے کہ دھان کی اچھی اور معیاری فصل کی پیداوار حاصل کرنے کیلئے بر وقت برداشت نہایت ضروری ہے ۔ترجمان کے مطابق دھان کی برداشت کا مناسب وقت وہ ہے جب دانے میں 20 تا 22 فیصد نمی رہ جائے اور جب اوپر والے دانے مکمل پک جائیں اور نیچے والے کچھ دانے سبز رنگ کے ہوں ، دھان کی فصل کی برداشت کے لیے دستی طریقے کی بجائے مشینی طریقہ زیادہ فائدہ مند ہے کیونکہ فصل مناسب وقت پر کٹائی کر کے محفوظ کر لی جاتی ہے،دھان کی برداشت کے لیے رائس ہارویسٹر اور رائس کمبائن ہارویسٹر زیادہ بہتر مشینیں ہیں۔
انہوں نے کہا کہ ایک اندازے کے مطابق مونجی کی پیداوار کا 5 سے 10فیصد نقصان کٹائی اور پھنڈائی میں مناسب احتیاط نہ برتنے سے ہوتا ہے، کٹائی کے بعد پھنڈائی کا مرحلہ آتا ہے اس لئے فصل کی کٹائی کے بعد جلد از جلد پھنڈائی کر لینی چاہیے ۔انہوں نے کہا کہ چاول کی کٹائی کے موسم میں عموما دن قدرے گرم ہوتے ہیں جبکہ راتیں ٹھنڈی اور کافی مقدار میں اوس پڑتی ہے،
فصل رات کو اوس سے بھیگ جاتی ہے اور دن کی دھوپ میں سوکھ جاتی ہے، اس طرح متواتر تر اور خشک ہونے سے دانوں میں پھپھوندی پڑ جاتی ہے اور چھڑائی متاثر ہوتی ہے۔ ترجمان نے مزید کہا کہ کاشتکار وقت پر دھان کی فصل کی کٹائی اور پھنڈائی کا اہتمام کریں تاکہ فی ایکڑ زیادہ پیداوار حاصل ہو سکے۔
Short Link: https://urdu.app.com.pk/urdu/?p=508894
