دھان کے مڈھوں کو جلانے سے فضا آلودہ،زمین کی زرخیزی متاثر ہوتی ہے، محکمہ زراعت

سیالکوٹ۔18اکتوبر (اے پی پی):اسسٹنٹ ڈائریکٹر محکمہ زراعت(توسیع ) سیالکوٹ جواہر علی نے کہا ہے کہ دھان کے کاشتکار مڈھوں کی تلفی کے لئے انہیں آگ لگانے سے گریزکریں کیونکہ اس اقدام سے زمین کی بالائی سطح پر موجود نامیاتی مادے کو درجہ حرارت بڑھنے سے ناقابل تلافی نقصان پہنچتا ہے

اور زمین کی زرخیزی متاثر ہوتی ہے۔ان خیالات کا اظہار انہوں نے ’’اے پی پی ‘‘سے گفتگو کے دوران کیا۔انہوں نے کہا کہ مڈھوں کی تلفی کے لئے گہرا ہل چلائیں اور دھان کے کاشتکار روٹا ویٹر یاڈسک ہیرو کے استعمال سے دھان کے مڈھوں کو زمین میں ملا ئیں جس سے زمین کی زرخیزی بڑھتی ہے،مڈھوں کو آگ لگانے سے نہ صرف زمین کی زرخیزی متاثر ہوتی ہے بلکہ فضائی آلودگی میں اضافہ ہوتاہے۔

ان کا کہنا تھا کہ مڈھوں کو آگ لگانے سے فضا میں دھواں سموگ کی شکل اختیار کرلیتاہے جو ٹریفک حادثات اور انسانی زندگیوں کا ضیا ع کا باعث بنتا ہے، فضائی آلودگی سے کئی بیماریاں جنم لیتی ہیں ، دھان کے کاشتکار وں سے گزارش ہے کہ مڈھوں کوآگ نہ لگائیں۔

Short Link: https://urdu.app.com.pk/urdu/?p=514376