ملتان۔ 26 اکتوبر (اے پی پی):محکمہ زراعت نے دھان کے کاشتکاروں کو فصل کی کٹائی کے بعد باقیات کو ٹھکانے لگانے سے متعلق خصوصی ہدایات جاری کر دیں۔ترجمان محکمہ زراعت نے کہا ہے کہ دھان کے کاشتکار کٹائی کے بعد فصل کی باقیات کوآگ لگانے سے گریز کریں،دھان کی باقیات کو آگ لگانے سے سموگ پیدا ہوتا ہے جو انسانی صحت اور ماحول کے لیے انتہائی مضر ہے،کاشتکار دھان کی کٹائی کے بعد سموگ سے بچاؤ کیلئے باقیات کو آگ ہرگز نہ لگا ئیں،دھان کے کاشتکار فصلوں کی باقیات کی تلفی کیلئے محکمہ زراعت کی ہدایات پر عمل کریں، دھان کی باقیات کو آگ لگانا قابلِ سزا جرم ہے۔
ترجمان محکمہ زراعت کی جانب سے جاری ہدایات میں کہا گیا ہے کہ دھان کے مڈھوں کو آگ لگانے سے زمین کی بالائی سطح پر موجود نامیاتی مادہ کو نقصان پہنچتا ہے اور زمین کی زرخیزی متاثر ہوتی ہے۔ترجمان محکمہ زراعت نے مزید کہا ہے کہ امسال وزیر اعلیٰ پنجاب کے سموگ کنٹرول پروگرام کے تحت پانچ ارب روپے کی لاگت سے کاشتکاروں کو سپر سیڈرز 60 فیصد سبسڈی پر فراہم کیے جا رہے ہیں تاکہ فصلوں کی باقیات کو جدید مشینری کے استعمال سے کار آمد بنایا جا سکے،دھان کے کاشتکار سپر سیڈرز کی مدد سے بھی فصل کی باقیات کو تلف کر سکتے ہیں۔
ترجمان محکمہ زراعت نے بتایا ہے کہ دھان کے کاشتکار کٹائی کے بعد مڈھوں کو آگ لگانے کی بجائے انہیں زمین میں ملا کر زمین کی زرخیزی میں بھی اضافہ کرسکتے ہیں،اس ضمن میں دھان کے مڈھوں کو تلف کرنے کیلئے کاشتکار دستی کٹائی کی صورت میں روٹا ویٹر اور مشین سے کٹائی کی صورت میں ڈسک ہیرو کی مدد سے فصل کی باقیات کو زمین میں ملا دیں یا گہرا ہل چلا کر آدھی بوری یوریا فی ایکڑ چھٹہ کر کے پانی لگا دیں،اس سے زمین کی زرخیزی اور پیداواری صلاحیت میں اضافہ ہوگا۔
انہوں نے مزید کہا ہے کہ حکومت پنجاب کی ہدایات کے مطابق دھان کے مڈھوں کو آگ لگانا ایک قابلِ سزا جرم ہے،دھان کے مڈھوں اور پرالی کو آگ لگانے والے عناصر کے خلاف جرمانہ اور گرفتاری عمل میں لائی جا رہی ہے،اس لئے کاشتکار دھان کی کٹائی کے بعد باقیات کو آگ لگانے سے گزیز کریں۔
Short Link: https://urdu.app.com.pk/urdu/?p=517342
