ذوالفقار علی بھٹو اور بینظیر بھٹو جیسے رہنما صدیوں میں پیدا ہوتے ہیں، تمام سیاسی جماعتیں مل بیٹھ کر پارلیمانی نظام کو مضبوط کریں، گورنر پنجاب

راولپنڈی ۔17اپریل (اے پی پی):گورنر پنجاب سردار سلیم حیدر خان نے کہا ہے کہ ملک کو آگے لے کر جانے کے لیے تمام سیاسی جماعتیں مل بیٹھ کر پارلیمانی نظام کو مضبوط کریں، شفاف الیکشن کے لیے سب مل بیٹھ کر اقدامات کریں،پی پی کی 2008 میں بننے والی حکومت کو سو موٹو ایکشن کا بار بار سامنا کرنا پڑا جو حکومت کے خلاف سازش تھی، ذوالفقار علی بھٹو اور بینظیر بھٹو جیسے رہنما صدیوں میں پیدا ہوتے ہیں،پاکستان میرا گھر ہے یہاں ہی جینا مرنا ہے، سچ اور حق بات کہتا رہوں گا۔

ان خیالات کا اظہار انہوں نے جمعرات کو ڈسٹرکٹ بار راولپنڈی کی جانب سے منعقدہ تقریب سے خطاب کرتے ہوئے ۔ ڈسٹرکٹ بار راولپنڈی پہنچنے پر گورنر پنجاب کا شاندار استقبال کیا گیا۔گورنر پنجاب سردار سلیم حیدر خان نے کہا کہ ڈسٹرکٹ بار راولپنڈی نے عزت افزائی کی جس پر ان کا شکر گزار ہوں،ڈسٹرکٹ بار راولپنڈی نے میرا مشکل وقت میں ساتھ دیا۔ 2008 کا الیکشن مشکل الیکشن تھا مگر ڈسٹرکٹ بار راولپنڈی کے متحرک کردارکی وجہ سے کامیابی حاصل ہوئی۔ مشکل صورتحال میں نظریہ مقدم رکھنا ہی سیاست ہے۔

راولپنڈی میں پلا بڑھا ہوں، ڈسٹرکٹ بار سے ہمیشہ قریبی تعلق رہا۔ گورنر پنجاب نے کہا کہ قانون کی بالادستی کے لیے وکلاء نے تاریخی جہدوجہد کی ہے۔ ڈسٹرکٹ بار راولپنڈی میں وکلاء کےبھائی چارے کا مظاہرہ مثالی ہے۔ پیپلز پارٹی کارکنوں کی جماعت ہے، بحیثیت کارکن پی پی قیادت نے گورنر بنایا، پی پی نے ہی رکشہ ، سائیکل چلانے والے اور جھگی میں رہنے والوں کو سینیٹر بنایا، پی پی نے کارکن راجہ پرویز اشرف کو وزیر اعظم بنایا، مجھے گورنر بنایا ، پی پی ہمیشہ سیاسی کارکنوں کو اہمیت دیتی ہے۔

انہوں نے کہا کہ حقیقی جمہوریت صرف وکلاء میں ہے، ہر سال الیکشن ہوتے ہیں۔ بلا تفریق گورنر ہائوس کے دروازے سب کے لیے کھلے ہیں۔ ہر الیکشن میں دھاندلی کا شور اٹھتا ہے، ہارنے والا احتجاج کرنا شروع کر دیتا ہے جس سے حکومتی کارکردگی متاثر ہوتی ہے۔ نظام کو چلانے کے لیے ایسے اقدامات کی ضرورت ہے کہ کوئی نظام پر انگلی نہ اٹھائے۔انہوں نے کہا ہے کہ ملکی عزت اور وقار کے لیے ہر طرح کی قربانی دیتے رہیں گے۔

تقریب سے خطاب کرتے ہوئے وکلاء قیادت کا کہنا تھا کہ آج تاریخی دن ہے کہ گورنر پنجاب ہمارے درمیان موجود ہیں۔ گورنر پنجاب ہمارے ڈویژن سے ہیں۔ بار خوبصورت روایات کی حامل ہے۔ اس بار سے بے نظیر بھٹو نے بھی خطاب کیا، گورنر پنجاب ملنسار انسان ہیں۔ تقریب میں صدر ڈسٹرکٹ بار راولپنڈی سردار منظر بشیر، سابق جسٹس قلب حسن شاہ ممبر پاکستان بار کونسل، بشارت اللہ خان وائس چیئرمین پنجاب بار کونسل، اسد عباسی ممبر پنجاب بار کونسل،ساجد تنولی سیکرٹری جنرل پیپلز لائرز فورم سمیت وکلاء کی بڑی تعداد نے شرکت کی ۔

Short Link: https://urdu.app.com.pk/urdu/?p=583689