اسلام آباد۔17جنوری (اے پی پی):وفاقی حکومت کی رائٹ سائزنگ سے متعلق کمیٹی نے رائٹ سائزنگ کے چوتھے مرحلہ میں وزارت مواصلات، وزارت ریلوے، وزارت تخفیف غربت و سماجی تحفظ، ریونیو ڈویژن،پٹرولیم ڈویژن اور ان سے منسلک محکموں کی رائٹ سائزنگ کے تعین کا فیصلہ کیاہے۔وفاقی حکومت کی رائٹ سائزنگ سے متعلق کمیٹی کا اجلاس جمعہ کو یہاں وفاقی وزیر خزانہ و محصولات سینیٹر محمد اور نگزیب کی زیر صدارت منعقدہوا۔اجلاس میں وفاقی وزیر مواصلات عبدالعلیم خان، اراکین قومی اسمبلی اور متعلقہ وزارتوں اور ڈویژنوں کے وفاقی سیکرٹریز نے شرکت کی۔
اجلاس کے آغاز میں وزیر خزانہ نے 43 وزارتوں کا جائزہ لینے سے متعلق مشق کے پہلے تین مراحل کی کا میابی کیلئے وزارتوں اور ان کے انچارج وزراء کی طرف سے اپنائے گئے طریقہ کار اور کارکردگی کی تعریف کی اور کہا کہ جاری مالی سال کے اختتام تک 43 وزارتوں اور ان سے منسلک 400 اداروں کی رائٹ سائزنگ کی جا رہی ہے۔
انہوں نے کہا کہ ذیلی کمیٹی مرکزی کمیٹی کے فیصلوں اور وفاقی کا بینہ کی توثیق پر عمل درآمد کا جائزہ لے گی اور ان کے لیے فالو اپ کرے گی، مرکزی کمیٹی صرف ضروری معاملات میں مداخلت کرے گی۔ انہوں نے کہا کہ چوتھے مرحلہ میں پانچ وزارتوں وزارت مواصلات، وزارت ریلوے، وزارت تخفیف غربت و سماجی تحفظ، ریونیو ڈویژن،پٹرولیم ڈویژن اور ان سے منسلک محکموں کی رائٹ سائزنگ کا تعین کیا جائے گا۔
اجلاس میں وزارت مواصلات کی جانب سے وزارت کے افعال، تنظیمی ڈھانچے اور مختلف منصوبوں و اقدامات کے لیے نیم نجکاری اور پبلک پرائیویٹ پارٹنرشپ ماڈلز کے امکانات پر تفصیلی پریزنٹیشن دی گئی۔ کمیٹی کو بتایا گیا کہ رائٹ سائزنگ کی روح کے مطابق وزارت مواصلات نے تمام غیر فعال عہدوں کو ختم کر دیا ہے۔
وفاقی وزیر مواصلات عبدالعلیم خان نے وزارت کے بنیادی افعال پر روشنی ڈالی اور اس بات پر زور دیا کہ این ایچ اے کو منافع بخش ادارہ بنایا جا سکتا ہے۔ انہوں نے کہا کہ اگر سکھر سے کراچی پورٹ تک جانے والی ایم سکس موٹروے کی طرح این ایچ اے کے وسائل کو آمدنی پیدا کرنے والے موٹرویز کی تعمیر کی طرف موڑ دیا جائے تو یہ حکومت کے لیے ایک بڑی آمدنی کا ذریعہ بن سکتی ہے۔
