راولپنڈی،عید پر پولیو وائرس کی روک تھام کے لئے قطرے پلانے کا پلان مرتب کر لیا گیا

راولپنڈی۔ 20 مارچ (اے پی پی):راولپنڈی میں عید پر پولیو وائرس کی روک تھام کے لئے قطرے پلانے کا پلان مرتب کر لیا گیا ہے۔ پلان کے تحت سفر کرنے والے بچوں کو قطرے پلائے جائیں گے، پنجاب سے باہر جانے والے اور داخل ہونے والے بچوں کو قطرے پلائے جائیں گے۔ پلان کی منظوری انسداد پولیو پروگرام سربراہ عدیل تصور کی جانب سے دی گئی ہے۔

پلان کے تحت پنجاب کے 13 اضلاع میں مخصوص مقامات پر پولیو ٹیمیں تعینات کی جائیں گی۔ پولیو ٹیموں کو بس اڈوں، ریلوے اسٹیشنز، ہسپتالوں اور شاپنگ سنٹروں پر تعینات کیا جائے گا۔ پولیو ٹیموں کو لاہور، راولپنڈی، اٹک، میانوالی، ملتان، فیصل آباد، سیالکوٹ، گجرانوالہ، گجرات، بہاولپور، رحیم یار خان، اوکاڑہ، ساہیوال، راجن پور، ڈیرہ غازی خان، سرگودھا میں تعینات کیا جائے گا۔ ٹیموں کی تعیناتی 22 مارچ سے کی جائے گی اور پولیو ٹیموں کو 20 دن کے لئے تعینات کیا جائے گا۔

اپنے پیغام میں انسداد پولیو پروگرام سربراہ کا کہنا تھا کہ ملک بھر میں پولیو وائرس کی گردش جاری ہے، بچے پولیو کے نشانے پر ہیں وائرس کسی بھی بچے کو متاثر کر سکتا ہے۔ ان کا کہنا تھا کہ پولیو وائرس سفر کرتی آبادیوں کے ساتھ منتقل ہو سکتا ہے۔ وائرس کی گردش کو روکنے کے لئے ٹیموں کی تعیناتی کی گئی ہے، ٹیموں کو چوکس رہنے کی ہدایات دی گئی ہیں۔ عدیل تصور نے زور دیتے ہوئے کہا کہ پولیو ٹیمیں ہر بچے کو قطرے پلائیں،حکومت اور محکمہ پولیو کے خاتمے کے لئے کوشاں ہے۔ والدین پولیو ٹیموں سے بھرپور تعاون کریں۔

Short Link: https://urdu.app.com.pk/urdu/?p=574751