راولپنڈی ۔22اپریل (اے پی پی):ایس ایس پی آپریشنز کاشف ذوالفقار نے کہا ہے کہ راولپنڈی پولیس نے ہنی ٹریپ کے ذریعے شہریوں کو لوٹنے والے 2بڑے گینگز گرفتار کر کے سات لاکھ روپے سے زائد رقم اور اسلحہ برآمد کرلیا ہے۔منگل کو پولیس لائنز ہیڈ کوارٹرز میں پریس کانفرنس کرتے ہوئے انہوں نے بتایا کہ گینگز صدربیرونی اور صادق آباد پولیس نے گرفتار کیے، دونوں گینگز ہنی ٹریپ کے ذریعے شہریوں کو لوٹنے میں ملوث ہیں،دونوں گینگز کے کل 16ملزمان کو گرفتار کیا گیا،گینگز سے تفتیش میں مزید پیشرفت اور ریکوری متوقع ہے۔ گینگز میں پاکستانی نژاد افریقن خاتون، پولیس اہلکار اور دیگر ارکان شامل ہیں،دونوں گینگز سے 7لاکھ50ہزار روپے اور اسلحہ برآمد ہوا، گینگز سے تفتیش میں مزید انکشافات اور ریکوری متوقع ہے،دونوں گینگز کے ارکان سوشل میڈیا کے ذریعے شہریوں کو ٹریپ کر کے ان کو لوٹتے تھے۔
صدر بیرونی پولیس نے پاکستانی نژاد مشرقی افریقن خاتون سمیت 6 افراد کو گرفتار کر لیا،گینگ کی لیڈی سرغنہ مرینہ خان پاکستانی نژاد (مشرقی افریقن) ملاوی ہے،گینگ میں سرغنہ مرینہ خان کا شوہر بلال اور دیگر ارکان فاروق، طیب، کامران اور عبدالجبار شامل ہیں،مرینہ خان گینگ سے 02 لاکھ 50ہزارروپے اور اسلحہ برآمدہوا،مرینہ خان سوشل میڈیا پلیٹ فارمز پر شہریوں سے رابطہ کر کے ملاقات کے لیے بلاتی اور پھر گینگ ممبران اسلحہ کی نوک پر اس سے رقم اور قیمتی اشیاء چھین لیتے،مرینہ خان گینگ نے متعدد وارداتوں کا انکشاف کیا۔
صادق آباد پولیس نے10رکنی آفتاب عرف تابی گینگ گرفتار کیا،آفتاب عرف تابی گینگ سے5لاکھ روپے اور اسلحہ برآمد ہوا،آفتاب عرف تابی گینگ کا سرغنہ ہے جس نے خواتین، دیگر ساتھیوں اور پولیس اہلکاروں کے ساتھ مل کر گینگ بنا رکھا تھا،گرفتار ملزمان میں آفتاب، حمزہ،شان، ہاجرہ،عظمیٰ، مبشر،رضاعباس،فضل عباس،نعمان اور افضال شامل ہیں،ہاجرہ مخصوص سوشل میڈیا ایپ کے ذریعے شہریوں کو ٹریپ کرتی تھی،
شہری کو ملنے کے بہانے بلایا جاتا تھا اور ان کی نازیبا ویڈیوز، تصاویر بنا کر بلیک میل کیا جاتا تھا،گینگ جڑواں شہروں کے شہریوں کو ہنی ٹریپ کے ذریعے بلیک میل کر کے لوٹنے کی متعدد وارداتوں میں ملوث تھے،گینگ میں شامل پولیس اہلکار گینگ کے دیگر ممبران کی پشت پناہی کرتے اور شہریوں کو بلیک میل کرنے میں ان کا ساتھ دیتے تھے۔
Short Link: https://urdu.app.com.pk/urdu/?p=585898
