راولپنڈی۔ 23 اپریل (اے پی پی):راولپنڈی (اے پی پی)سی ای اوراولپنڈی ویسٹ مینجمنٹ کمپنی رانا ساجد صفدر نے کمپنی سے ریٹائر ہونے والے چار محنتی ملازمین کو ان کی طویل، مخلصانہ اور مثالی خدمات کے اعتراف میں تعریفی اسناد سے نوازا ہے،گزشتہ روز راولپنڈی ویسٹ مینجمنٹ کمپنی کے ہیڈ آفس میں ایک پُروقار تقریب کا انعقاد کیا، جس میں ادارے کے افسران، سینیٹری عملے اور مختلف شعبوں کے نمائندگان نے شرکت کی۔ریٹائر ہونے والے ملازمین میں سینیٹری انسپکٹر محمد اصغر،سینیٹری ورکرز رکھل بی بی، امین، اور نیامت شامل ہیں،تقریب سے خطاب کرتے ہوئے سی ای او رانا ساجد صفدر نے کہا کہ صفائی کا عملہ ہمارے ادارے کا بنیادی ستون ہے۔ ان ہی لوگوں کی بدولت آج راولپنڈی کا شہر صاف ستھرا ہے۔
ہم ان کی برسوں پر محیط محنت، وفاداری اور فرض شناسی کو خراج تحسین پیش کرتے ہیں۔ ستھرا پنجاب پروگرام انہی جیسے محنت کشوں کی وجہ سے عملی شکل اختیار کر رہا ہے۔ریٹائرڈ سینیٹری انسپکٹر محمد اصغر نے کہا کہ میں نے ہمیشہ ایمانداری اور دیانت سے کام کیا، اور آج جو عزت مجھے یہاں سے رخصت کرتے ہوئے ملی ہے، وہ میری تمام تھکن دور کر گئی ہے۔ مجھے فخر ہے کہ میں نے اس ادارے کی بنیادوں میں اپنی محنت شامل کی۔سینیٹری ورکر رکھل بی بی نے کہا کہ میں نے ایک عورت ہوتے ہوئے کئی مشکلات کا سامنا کیا، لیکن کمپنی نے مجھے ہمیشہ حوصلہ دیا۔ آج میں اس عزت افزائی پر بے حد مشکور ہوں، یہ لمحہ میری زندگی کا یادگار دن ہے۔
سینیٹری ورکر امین نے خوشی کا اظہار کرتے ہوئے کہا کہ جب میں نے نوکری شروع کی، تو صرف ایک مقصد تھا کہ اپنے بچوں کو عزت کی روٹی کھلاؤں۔ آج کمپنی نے مجھے اس انداز سے رخصت کیا کہ میرے دل کو سکون ملا۔ سی ای او صاحب کا شکریہ کہ انہوں نے ہمیں صرف ورکر نہیں بلکہ ادارے کا حصہ سمجھا۔سینیٹری ورکرنیامت نے کہا کہ کبھی چھٹی نہیں مانگی، کبھی کام سے پیچھے نہیں ہٹا، کیونکہ میں نے اسے اپنا فرض سمجھا۔ آج جو عزت، دعائیں اور تحسین ملی ہے، اس سے بڑی تنخواہ کوئی نہیں ہو سکتی۔
اللہ اس ادارے کو ترقی دے۔تقریب کے آخر میں سی ای او نے تمام ریٹائرڈ ملازمین کو فرداً فرداً اسناددیں اور نیک تمناؤں کے ساتھ الوداع کہا۔ اس موقع پر تمام شرکاء نے کھڑے ہو کر تالیاں بجا کر محنت کشوں کو خراج تحسین پیش کیا۔
Short Link: https://urdu.app.com.pk/urdu/?p=586455
