راولپنڈی۔2اپریل (اے پی پی):راولپنڈی پولیس کی جانب سے چاند رات اور عید الفطر کے موقع پر سکیورٹی کے سخت انتظامات کیے گئے۔ عید الفطر کے ایام میں راولپنڈی پولیس کے 5000 سے زائد افسران نے ڈیوٹی کے فرائص انجام دیئے۔ 700 سے زائد مساجد، امام بار گاہوں اور کھلے مقامات پر عید کے اجتماعات کے لیے خصوصی سکیورٹی انتظامات کیے گئے تھے۔ بازاروں میں خواتین کو محفوظ اور پر سہولت ماحول کو یقینی بنانے کے لیے ویمن سیفٹی سکواڈ اور تھانوں کے سکواڈ نے گشت کے فرائض انجام دیئے۔
بازاروں میں آنے والی فیملیز اور خواتین کی سہولت و حفاظت کے لیے ویمن سیفٹی اسکواڈ کی 130 سے زائد لیڈی پولیس افسران نے فرائض انجام دیئے۔ چاند رات پر شرپسند اور جرائم پیشہ عناصر کی روک تھام کے لیے 30 خصوصی پکٹس پر 400 افسران نے فرائض انجام دیئے۔
ون ویلنگ کی روک تھام کے لیے ٹریفک پولیس کی بھی خصوصی پکٹس اور ٹیمیں مامور کی گئی تھی۔ ٹریفک کی روانی کو برقرار رکھنے کے لیے ٹریفک پولیس کے 600 سے زائد افسران نے ٹریفک ڈیوٹی کے فرائص انجام دیئے۔ سی پی او کا کہنا تھا کہ شہریوں کے جان و مال کی حفاظت اولین ذمہ داری ہے جس کے لیے تمام وسائل بروئے کار لائے جا رہے ہیں۔
Short Link: https://urdu.app.com.pk/urdu/?p=577930
