رحیم یار خان۔ 15 نومبر (اے پی پی):سپورٹس بورڈ پنجاب کے زیر اہتمام ضلعی سپورٹس آفس کی زیر نگرنی پنجاب کی تاریخ کے سب سے بڑے گیمز”کھیلتا پنجاب“ کے ضلع سطح کے مقابلے اختتام پذیر ہوگئے۔اختتامی رنگارنگ تقریب تقسیم انعامات سپورٹس جمنازیم میں منعقد ہوئی جس میں روہی کے مشہور فنکاروں اور خواجہ فرید کالج کے طلباء نے اپنے فن کا مظاہرہ کیا۔
مہمان خصوصی اسسٹنٹ کمشنر وقاص ظفر جبکہ صدارت سابق ایم این اے و ممبر ضلعی کوارڈینیشن کمیٹی میاں امتیاز احمد نے کی تقریب میں ڈسٹرکٹ سپورٹس آفیسر اشفاق احمد، پرنسپل خواجہ فرید کالج پروفیسر ڈاکٹر خالد محمود، پرنسپل دانش سکول گرلز روبینہ بدر، رانا شیر افگن ایڈووکیٹ سمیت آفیشلز اور شایقین نے شرکت کی۔
سابق ایم این اے میاں امتیاز احمد نے اسسٹنٹ کمشنر وقاص ظفر، ڈسٹرکٹ سپورٹس آفیسر اشفاق احمد کے ہمراہ مختلف کھیلوں میں نمایاں کارکردگی دکھانے والے کھلاڑیوں اور ٹیموں میں لاکھوں روپے کے کیش انعامات اور ٹرافیاں تقسیم کیں۔اسسٹنٹ کمشنر نے نمایاں کارکردگی دکھانے والی ٹیموں و کھلاڑیوں کو مبارکباد دی اور ان کے لیے نیک خواہشات کا اظہار کیا۔ سابق ایم این اے میاں امتیاز احمد نے کہا کہ وزیر اعلیٰ پنجاب مریم نواز شریف کے وژن کے تحت کامیاب ایونٹ پر منتظمین مبارکباد کے مستحق ہیں۔
ڈسٹرکٹ سپورٹس آفیسر نے اشفاق احمد نے کہا کہ پنجاب گیمز کے پہلے مرحلے میں ضلع کی سطح پر 6 گیمز اتھلیٹکس (بوائز اینڈگرلز)، بیڈ منٹن (بوائز اینڈ گرلز)، فٹ بال، کبڈی، ہاکی اور کرکٹ ٹیپ بال کا انعقاد کیا گیا جس میں ضلع کی چاروں تحصیلوں سے گرلز اینڈ بوائز ٹیموں نے شرکت کی اور فائنل جیتنے والی ٹیمیں ڈویژنل سطح کے مقابلوں میں ضلع کی نمائندگی کریں گی۔
