رشکئی۔15جون (اے پی پی):وزیراعظم شہباز شریف نے ہدایت کی ہے کہ رشکئی اقتصادی زون میں ترقیاتی کام مقررہ مدت کے اندر مکمل کئے جائیں اور تمام رکاوٹوں کو فوراً دور کیا جائے۔
انہوں نے یہ ہدایت بدھ کو یہاں رشکئی خصوصی اقتصادی زون کے دورہ کے دوران جائزہ اجلاس کی صدارت کرتے ہوئے دی۔ اجلاس میں وفاقی وزیر منصوبہ بندی احسن اقبال ,وفاقی وزیر مواصلات اسعد محمود، وفاقی وزیر براے اوور سیز پاکستانیز ساجد طوری، وزیراعظم کے مشیر امیر مقام، پاکستان میں چینی سفارتخانے کی ناظم الامور چینی کمپنی کے نمائندوں اوراعلیٰ سرکاری افسران نے شرکت کی ۔
اجلاس کو رشکئی خصوصی اقتصادی زون پر جاری کام کے حوالے سے بریفنگ دی گئی۔ اجلاس کو بتایا گیا کہ رشکئی خصوصی اقتصادی زون 1000ایکڑ پر محیط ہے۔
اجلاس کو مزید بتایا گیا کہ رشکئی خصوصی اقتصادی زون کو پبلک پرائیویٹ پارٹنرشپ موڈ کے تحت خیبر پختونخوا اکنامک زونز ڈویلپمنٹ اینڈ منجمنٹ کمپنی KPEZDMC اور CRBC (ایک سرکاری چینی انٹرپرائز) کے تعاون سے SPV یعنی رشکئی اسپیشل اکنامک زون ڈویلپمنٹ اینڈ آپریشنز کمپنی کے ذریعے بنایا جا رہا ہے۔ اس کمپنی میں KPEZDMC کے 9 فیصد اور CRBC کے 91فیصدشیئرز ہیں جو اس نوعیت کا پہلا معاہدہ ہے۔چینی کمپنی اس خصوصی اقتصادی زون کے آپریشنز کی ذمہ دار ہیں۔
رشکئی خصوصی اقتصادی زون میں لائٹ انجینئرنگ، آٹو موٹیو، کنسٹرکشن اور فوڈ پروسیسنگ اور برآمدات کو مد نظر رکھتے ہوئے شعبوں کو ہدف بنایا ہے جس میں مقامی لوگوں کے لئے براہ راست اور بالواسطہ ملازمتیں پیدا کرنے اور اقتصادی سرگرمیاں پیدا کرنے کی صلاحیت ہے۔
اجلاس کو مزید بتایا گیا کہ رشکئی خصوصی اقتصادی زون میں پانی کی پائپ لائن بچھانےجبکہ گیس پائپ لائن بچھانےکا کام اور سول ورکس تکمیل کے مراحل میں ہے ۔اجلاس کو مزید بریف کیا گیا کہ رشکئی خصوصی اقتصادی زون میں 2 صنعتی یونٹس کی تعمیر کا کام جاری ہے جبکہ چند مزیدصنعتی یونٹس کی تعمیر کا آغاز بھی جلد کر دیا جائے ۔اجلاس کو بتایا گیا کہ سوئی ناردرن گیس پائپ لائنز لمیٹڈ نے زون تک گیس کی فراہمی یقینی بنا دی ہے جبکہ نیشنل ٹرانسمیشن اینڈ ڈسپیچ کمپنی زون تک بجلی کی فراہمی کے لیے گرڈ اسٹیشن بنا رہی ہے ۔
وزیر اعظم نے ہدایت کی کہ رشکئی خصوصی اقتصادی زون میں جاری ترقیاتی کاموں کے حوالے سے دی گئی مقررہ مدت پر سختی سے عمل کیا جائے۔ وزیراعظم نے مزید ہدایت جاری کی کہ رشکئی خصوصی اقتصادی زون کے حوالے سے وفاقی اور صوبائی اداروں میں جہاں جہاں ہم آہنگی کی کمی اور مشکلات ہیں انہیں جلد از جلد دور کیا جائے ۔مزید برآں ہدایت کی کہ چینی کمپنی کو ہر ممکن مدد فراہم کی جائے تا کہ خصوصی اقتصادی زون پر کام کی رفتار تیز تر کی جا سکے ۔
وزیراعظم نےکہا کہ ہم سب نے مل کر صنعتی ترقی اور ریونیو بڑھانے کے لئے کام کرنا ہے تاکہ پاکستان کو ایک ترقی یافتہ ملک بنایا جا سکے۔ وزیر اعظم نےچینی کمپنیز کو سرمایہ کاری کی دعوت دیتے ہوئے کہا کہ چین اور پاکستان کی کمپنیز ایک دوسرے کا تجربات سے فائدہ اٹھا سکتی ہیں۔ انہوں نے مزید کہا کہ چھوٹے صوبوں میں اقتصادی زونز کی تعمیر ہماری ترجیح ہے۔ وزیر اعظم نےرشکئی خصوصی اقتصادی زون سائٹ کا دورہ بھی کیا اور ترقیاتی کاموں کا جائزہ لیا۔
Short Link: https://urdu.app.com.pk/urdu/?p=312614
