راولپنڈی ۔24اپریل (اے پی پی):روات چ نے کارروائی کرتے ہوئے خود کو کسٹم اہلکار ظاہر کرکے شہریوں کو لوٹنے والے 4 رکنی گروہ کو گرفتار کرلیا۔پولیس ترجمان کے مطابق گرفتار ملزمان کی شناخت ذیشان، حسن، اسد اور فرحان کے نام سے ہوئی ہے۔ پولیس نے بتایا کہ ملزمان شہری سے واردات کر رہے تھے کہ اس دوران پولیس نے مشکوک جان کر چیک کیا،ملزمان نے اپنا تعارف کسٹم اہلکاروں کے طور پر کروایا جو تحقیقات پر ثابت نہ کر سکے۔
ملزمان خود کو سرکاری ادارے کے اہلکار ظاہر کر کے گاڑیاں روکتے اور شہریوں کو لوٹتے تھے، گرفتار ملزمان کو شناخت پریڈ کے لیے جیل منتقل کیا جا رہا ہے۔ پولیس نے ملزمان سے شہری سے اسلحہ کی نوک پر چھینی گئی گاڑی ، جعلی نمبر پلیٹیں، ہتھکڑی، ریوالونگ لائٹ، وائرلیس سیٹ اور اسلحہ برآمد کر لیا۔
ایس پی صدر نے بروقت اور موثر کارروائی پر اے ایس پی صدر، ایس ایچ او روات اور ٹیم کو شاباش دیتے ہوئے کہا کہ سرکاری ادارے کے اہلکاروں کے روپ میں وارداتیں کرنے والا گینگ متعدد وارداتوں میں مطلوب تھا، ملزمان سے تفتیش میں اہم انکشافات متوقع ہیں۔ انہوں نے کہا کہ شہریوں کی جان و مال پر حملہ کرنے والوں سے آہنی ہاتھوں سے نمٹا جائے گا۔
Short Link: https://urdu.app.com.pk/urdu/?p=587186
