جنوبی وزیرستان۔20جنوری (اے پی پی):وزیر اعظم عمران خان نے بدھ کو اپنے جنوبی وزیرستان کے دورہ میں احساس کفالت پروگرام کا اجراء کیا اور ضلع میں پہلی بار منعقدہونے والے ڈیجیٹل سروے کا جائزہ لیا ، احساس قومی سماجی و معاشی سروے جس کے تحت ضلع میں مستحق افراد کو احساس کفالت اور دیگر وظائف دیئے جائیں گے، کا 9جنوری 2021کوآغاز ہوچکا ہے ۔وزیراعظم کی معاون خصوصی ڈاکٹر ثانیہ نشتر نے کہا کہ پہلی مرتبہ اس ضلع کی آبادی ایک شفاف اور قانو ن پر مبنی سماجی تحفظ پروگرام سے مستفید ہو گی ۔ انہوں نے مزید کہا کہ احساس کے شمار کنندگان گھر گھر جاکر ٹیبلٹس کے ذریعے ضلعی بنیادوں پر معلومات اکھٹی کریں گے ۔وزیر اعظم نے جنوبی وزیرستان میں احساس ڈیجیٹل ادائیگی کے نظام کے ذریعے احساس کفالت مستحقین میں رقوم کی تقسیم کے طریقہ کار کا جائزہ لیا ۔ احساس کفالت حکومت کا اہم ترین سیفٹی نیٹ پروگرام ہے جس کے تحت ملک بھر کی غریب خواتین کو 2000روپے ماہانہ مالی معاونت اور سیونگ بینک اکاءونٹ کی سہولت فراہم کی جاتی ہے ۔موجودہ جدید ڈیجیٹل سروے جنوبی وزیرستان میں وسیع پیمانے پر سماجی تحفظ کے اقدامات کی فراہمی کی بنیاد رکھے گا ۔ احساس سروے کے نتائج اس بات کا تعین کریں گے کہ اس ضلع کے کونسے گھرانے ماہانہ کفالت ادائیگی، وسیلہ تعلیم ڈیجیٹل کے سہ ماہی وظاءف، احساس انڈرگریجویٹ سکالرشپس، چھوٹے کاروبار کیلئے بلاسود قرضوں اور آمدنی بڑھانے کیلئے احساس آمدن پروگرام کے اہل ہیں ۔ سروے کے بعد ضلع میں احساس رجسٹریشن ڈیسک بھی لگائے جائیں گے تاکہ سروے میں رہ جانے والے گھرانوں کے اندراج کو بھی یقینی بنایا جاسکے ۔وزیر اعظم کو احساس قومی سماجی و معاشری رجسٹری (این ایس ای آر) سروے سے متعلق بھی آگاہ کیا گیا ۔ ڈاکٹر ثانیہ نے کہا کہ علاقے میں ملٹری آپریشن کے باعث 2011 میں ہونے والے سماجی و معاشی سروے میں جنوبی وزیرستان کا مکمل سروے نہیں ہوسکا تھا، لہذا یہ بہت اہم ا قدم ہے کہ یہ سروے کامیابی کیساتھ شروع کیا گیا ہے ۔مجموعی طور پر ،احساس کے تحت، جنوبی وزیرستان کی سماجی و معاشی تبدیلی کیلئے سماجی تحفظ اور تخفیف غربت کے متعدد اقدامات موجود ہیں ۔گذشتہ ایک سال میں ، احساس بلاسود قرضو ں کے تحت 3,706افراد کوچھوٹے کاروبار چلانے کیلئے 119ملین روپے کے قرضے فراہم کئے گئے ۔ احساس آمدن پروگرام کے ذریعے 4,000مستحق گھرانوں کو غربت سے باہر نکالنے کیلئے 240ملین روپے کے اثاثہ جات فراہم کئے گئے ۔ احساس انڈرگریجویٹ سکالرشپس پروگرام کے تحت،سال 2019-20 میں جنوبی وزیرستان کے مستحق اور ہونہار طلباء کو 102سکالرشپس دیں گئیں۔کویڈ19(اپریل 2020تا اکتوبر 2020)کے دوران، احساس ایمرجنسی کیش کے تحت جنوبی وزیرستان کے 14,821گھرانوں میں 177.85ملین روپے تقسیم کئے گئے ۔احساس بیت المال مدد کے تحت ، مخصوص افراد، تعلیم، صحت اور نقد مالی معاونت کے مستحق افراد کیلئے 8.83ملین روپے کی انفرادی مالی معاونت فراہم کی گئی ۔ڈاکٹر ثانیہ نے کہا کہ سروے مکمل ہونے کے بعد ہم ضلع میں مستحق افراد کیلئے سماجی تحفظ کے اقدامات میں اضافہ کریں گے ۔ جنوبی وزیرستان کی 25%آبادی احساس پروگرام سے مستفید ہوگی ۔ 20,000سے زائد گھرانے احساس کفالت کے تحت مستفید ہوں گے، وسیلہ تعلیم ڈیجیٹل پروگرام کے تحت 35,000سے زائد بچے تعلیم حاصل کریں گے، اور 2,500سے زائد بچوں اور مائوں کو2021 میں قائم ہونے والے 2نئے نشوونما زمراکز کے ذریعے اضافی وظاءف دیئے جائیں گے ۔ رواں سال خواتین کی با اختیاری کے مراکز بھی قائم کئے جائیں گے جوسالانہ 200مستحق خواتین کوروزی کمانے کیلئے تربیت فراہم کریں گے ۔ مزیدیہ کہ غریب ضرورت مند گھرانوں کی مالی معاونت کیلئے 22.3ملین روپے مختص کئے گئے ہیں ۔ مزید برآں ، احساس جنوبی وزیرستان میں بم،کان دھماکوں میں اپنے جسمانی اعضا ء گنوا دینے والے خصوصی افراد کیلئے 100مصنوعی اعضاء فراہم کرے گا ۔ ہم امید کرتے ہیں کہ اس سال مزید طلباء احساس انڈرگریجویٹ اسکالرشپ کی 50,000سکالرشپس سے مستفید ہونے کیلئے درخواستیں دیں گے جو اس سکیم کے تحت ہر سال فراہم کی جاتی ہیں۔
