روزہ سے صبر وبرداشت کے اوصاف پیدا ہوتے ہیں،ڈاکٹر حسین محی الدین قادری

لاہور۔13مارچ (اے پی پی):لاہور، صدر منہاج القرآن انٹرنیشنل پروفیسر ڈاکٹر حسین محی الدین قادری نے کہا ہے کہ روزہ صبر اور قوت برداشت کے اوصاف پیدا کرتا ہے،روزہ بہترین عبادت اور طبی و روحانی فیوض و برکات کا ذریعہ ہے،بھوک،پیاس پر قابو پا کر انسان اپنی خواہشات کو کنٹرول کرنا سیکھتا ہے،روزہ انسان کے نفس اور قلب و باطن کو ہر قسم کی آلودگی اور کثافت سے پاک و صاف کر دیتا ہے۔

ان خیالات کا اظہار انہوں نے مرکزی سیکرٹریٹ میں منعقد ہ تربیتی نشست سے خطاب کرتے ہوئے کیا۔ڈاکٹر حسین محی الدین قادری نے کہاکہ روزہ انسان کو تقوی اور پرہیز گاری کی راہ پر گامزن کرتا ہے،قرآن پاک میں ارشاد باری تعالیٰ ہے کہ اے ایمان والو تم پر روزے فرض کئے گئے ہیں جیسے تم سے پہلے لوگوں پر فرض کئے گئے تھے تا کہ تم پرہیز گار بن جائو، یہ آیت روزے کے اصل مقصد کو واضح کرتی ہے کہ اس کے ذریعے دل میں اللہ کا خوف اور نیکی کی جستجو پیدا ہوتی ہے۔۔

انہوں نے کہاکہ روزہ رکھنے والا بھوک اور پیاس کی شدت کو محسوس کرتا ہے جس سے اسے ان غریبوں اور ناداروں کا احساس ہوتا ہے جو ہر روز ایسی تکالیف کا سامنا کرتے ہیں،روزہ کا احساس دل میں ایثار،ہمدردی اور دوسروں کی مدد کا جذبہ پیدا کرتا ہے۔

انہوں نے کہاکہ دکھی اور مستحق انسانیت کی خدمت کے جذبے سے ا یک ایسا فلاحی معاشرہ وجود میں آتا ہے جس کی اساس باہمی محبت و مروت،انسان دوستی و درد مندی و غم خواری کی لافانی قدروں پر ہوتی ہے، روزہ قربانی و ایثار کا ایک مکمل عملی نمونہ ہے جو ہمیں دوسروں کیلئے جینے ،اپنی خواہشات پر قابو پانے اور اللہ کی رضا کیلئے قربانی دینے کا درس دیتا ہے۔انہوں نے کہاکہ روزہ ایک ایسا مقدس عمل ہے جو انسان کے دل و دماغ کو پاکیزہ بنا کر اسے روحانی بلندی عطا کرتا اور ایک بہترین انسان بننے میں مدد دیتا ہے۔

Short Link: https://urdu.app.com.pk/urdu/?p=572203