اسلام آباد۔29مئی (اے پی پی):پاکستان میں رومانیہ کے سفیر ڈاکٹر ڈین اسٹوینیسکو نے جمعرات کو قومی خبر رساں ادارے ایسوسی ایٹڈ پریس آف پاکستان (اے پی پی) کے منیجنگ ڈائریکٹر محمد عاصم کھچی سے ملاقات کی اور دونوں ممالک کے درمیان میڈیا کے شعبے میں تعاون کو تقویت دینے پر تبادلہ خیال کیا۔
سفیر نے خبروں کے تبادلے کو فروغ دینے کے لئے’’اے پی پی‘‘ اور رومانیہ کے خبر رساں ادارے ”ایجر پریس” کے درمیان صحافیوں کے تبادلے کی اہمیت کو اجاگر کیا۔ انہوں نے موجودہ ڈیجیٹل دور میں جدید معلوماتی ذرائع کے موثر استعمال کی ضرورت پر بھی زور دیا۔ایم ڈی’’ اے پی پی ‘‘اور رومانیہ کے سفیر نے کثیر الجہتی اشتراک کار سمیت میڈیا انڈسٹری میں تعاون کو مزید وسعت دینے کے طریقوں پر بھی تبادلہ خیال کیا۔ انہوں نے خبروں کے تبادلے میں مزید اشتراک کار اور تعاون اور باہمی مفاد میں مل کر کام کرنے کے عزم کا اظہار کیا۔
سفیر ڈاکٹر ڈین اسٹوینیسکو نے سیاحت، تعلیم اور عوامی سطح پر روابط کے فروغ میں تعاون بڑھانے میں دلچسپی ظاہر کی تاکہ دونوں اقوام کے درمیان بہتر افہام و تفہیم کو فروغ دیا جا سکے۔منیجنگ ڈائریکٹر عاصم کھچی نے دونوں ممالک کے درمیان ذرائع ابلاغ کے شعبے میں تعاون اور خبروں کے تبادلے کے لیے’’اے پی پی‘‘ کی جانب سے ہر ممکن تعاون کی یقین دہانی کرائی۔
