گلگت۔28اپریل (اے پی پی):ڈائریکٹر جنرل ایمرجنسی سروسز ریسکیو 1122 گلگت بلتستان عظیم اللہ کی ہدایات اور ایمرجنسی آفیسر اسلام الدین کی نگرانی میں ریسکیو 1122 سکردو اور اسوہ پبلک اسکول اینڈ کالج کے باہمی تعاون سے عالمی یومِ حفاظت (ورلڈ سیفٹی ڈے) کے موقع پر ایک خصوصی تربیتی پروگرام منعقد کیا گیا۔پروگرام کا مقصد طلبہ و طالبات میں ابتدائی طبی امداد ( فرسٹ ایڈ ) اور آگ سے تحفظ ( فائر سیفٹی ) کی بنیادی مہارتوں کو اجاگر کرنا تھا۔ ریسکیو 1122 کے ماہرین نے طلبہ کو فرسٹ ایڈ کے اہم نکات، جیسے سی پی آر دینا، زخموں پر فوری طبی امداد فراہم کرنا، فریکچر کی صورت میں حفاظتی تدابیر اختیار کرنا، اور جلنے کی صورت میں ابتدائی اقدامات کرنے کے طریقے، عملی مظاہروں کے ذریعے سکھائے۔
اسی طرح فائر ایمرجنسی ڈرلز کے دوران آگ لگنے پر ” سٹاپ، ڈراپ اینڈ رول” تکنیک، فائر ایکسٹنگشر کے درست استعمال کے لیے ” پاس ” اصول ، اور ایمرجنسی ایگزٹ روٹس کے متعلق تفصیلی آگاہی فراہم کی گئی۔ طلبہ نے جوش و خروش کے ساتھ تربیتی سرگرمیوں میں بھرپور حصہ لیا۔مہمانانِ خصوصی نے حفاظتی شعور اجاگر کرنے کے اس اقدام کو سراہتے ہوئے کہا کہ ایسی عملی تربیت نہ صرف تعلیمی اداروں کو محفوظ بناتی ہے بلکہ مجموعی طور پر معاشرتی تحفظ میں بھی اہم کردار ادا کرتی ہے۔ریسکیو 1122 نے آئندہ مزید تعلیمی اداروں میں اس نوعیت کی تربیتی ورکشاپس منعقد کرنے کے عزم کا اظہار کیا تاکہ ہنگامی صورتحال میں قیمتی جانوں کے تحفظ کو یقینی بنایا جا سکے۔
Short Link: https://urdu.app.com.pk/urdu/?p=589097
