ریلیف کمشنر پنجاب کا پی ڈی ایم اے ہیڈ آفس کا دورہ، کنٹرول روم کا معائنہ اور موسمی صورتحال کا جائزہ لیا

لاہور۔25فروری (اے پی پی):ریلیف کمشنر پنجاب نبیل جاوید نے پی ڈی ایم اے ہیڈ آفس کا دورہ کیا۔ ڈی جی پی ڈی ایم اے عرفان علی کاٹھیا نے ایس ایم بی آر کا استقبال کیا۔ ریلیف کمشنر پنجاب نبیل جاوید نے پی ڈی ایم اے کنٹرول روم کا دورہ کیا اور موسمی صورتحال کا جائزہ لیا۔ ڈی جی پی ڈی ایم اے نے ریلیف کمشنر پنجاب کو پی ڈی ایم اے کنٹرول روم کی ورکنگ بارے بریفنگ دی۔

ڈی جی پی ڈی ایم اے عرفان علی کاٹھیا کا کہنا تھا کہ موجودہ بارشوں کا سپیل 2 مارچ تک جاری رہنے کی پیشگوئی ہے۔ صوبے بھر کی انتظامیہ کو موسمی صورتحال بارے پیشگی الرٹ جاری کر دیا گیا ہے۔ ایس ایم بی آر نبیل جاوید نے مری میں متوقع برفباری کے پیش نظر انتظامات کا بھی جائزہ لیا۔ ڈی جی پی ڈی ایم اے نے مزید کہا کہ ممکنہ برفباری کے پیش نظر پی ڈی ایم اے اور مری انتظامیہ الرٹ ہیں،سیاحوں کی رہنمائی کیلئے 13 فیسیلی ٹیشن مراکز 24 گھنٹے الرٹ ہیں۔

ریلیف کمشنر پنجاب نے ممکنہ ہیٹ ویو سے متعلق پیشگی انتظامات مکمل کرنے کی ہدایات بھی کیں۔ ریلیف کمشنر پنجاب نبیل جاوید نے چولستان ٹوبوں میں پانی بارے تفصیلی بریفنگ لی جس میں بتایا گیا کہ فی الوقت تھل و چولستان میں پانی کی کوئی کمی نہیں ہے جبکہ ممکنہ ہیٹ ویو اور خشک سالی سے نمٹنے کیلئے انتظامات مکمل ہیں۔ ریلیف کمشنر پنجاب کا کہنا تھا کہ ممکنہ ہیٹ ویو اور خشک سالی سے نمٹنے کیلئے تمام تر انتظامات پیشگی مکمل کریں۔

Short Link: https://urdu.app.com.pk/urdu/?p=566192