ریاض۔7مارچ (اے پی پی):ادارہ امور الحرمین الشریفین نے زائرین حرم سے اپیل کی ہے کہ وہ آب زم زم کے استعمال میں احتیاط برتیں ، پانی پینے کے بعد استعمال شدہ گلاسوں کو مخصوص مقام پرڈالیں اورکولر کے ڈھکن کو نہ کھولیں۔
اردو نیوز کے مطابق ادارہ امور الحرمین کی جانب سے زائرین کو ہدایات کی گئی ہے کہ انتظامیہ کی جانب سے رمضان المبارک میں آب زم زم کی مستقل فراہمی کا خصوصی اہتمام کیا جاتا ہے۔زم زم کی مستقل فراہمی کو یقینی بنانے کے لیے 20 ہزار کولر مسجد الحرام کے مختلف مقامات پر رکھے گئے ہیں جن میں گلاس بھی موجود ہیں علاوہ ازیں استعمال شدہ گلاسوں کو رکھنے کی جگہ بھی مخصوص ہے ۔
ادارہ الحرمین نے کہا کہ مسجد الحرام میں وضو کے لیے جگہیں مخصوص ہیں جہاں باآسانی وضو کیا جاسکتا ہے اس لیے اس بات کا خیال رکھا جائے کہ آب زم زم کی سہولت پینے کے لیے فراہم کی گئی ہے۔واضح رہے کہ بعض لوگ آب زم زم کولروں سے وضو کرتے ہیں جس کی وجہ سے وہ جگہ گیلی ہو جاتی ہے اور دوسروں کے لیے مشکلات کا باعث بنتی ہے۔
