اسلام آباد۔27اگست (اے پی پی):زیر گردش کرنسی اور زر وسیع میں ہفتہ وار بنیادوں پر کمی ریکارڈ کی گئی ہے ۔ سٹیٹ بینک کی جانب سے جاری رپورٹ کے مطابق 15 اگست کو ختم ہونے والے ہفتے میں زیر گردش کرنسی کا حجم 10 ہزار 786 ارب روپے ریکارڈ کیا گیا جو پیوستہ ہفتے کے مقابلے میں 0.5 فیصد کم ہے ۔
پیوستہ ہفتے میں زیر گردش کرنسی کا حجم 10 ہزار 840 ارب روپے ریکارڈ کیا گیا تھا۔ جاری مالی سال سے لے کر اب تک زیر گردش کرنسی کے حجم میں مجموعی طور پر 1.4 فیصد کا اضافہ ہوا ہے۔ اعدادوشمار کے مطابق 15 اگست کو ختم ہونے والے ہفتے میں زر وسیع کا حجم 39 ہزار 390 ارب روپے ریکارڈ کیاگیا جو پیوستہ ہفتے کے مقابلے میں 0.2 فیصد کم ہے۔
پیوستہ ہفتے میں زروسیع کا حجم 39 ہزار 454 ارب روپے ریکارڈ کیا گیا تھا ، جاری مالی سال سے لے کر اب تک زر وسیع میں مجموعی طور پر 3.3 فیصد کی کمی ریکارڈ کی گئی ۔ سٹیٹ بینک کے مطابق 15 اگست کو ختم ہونے والے ہفتے میں بینکوں کے ڈیپازٹس کا مجموعی حجم 28 ہزار 553 ارب روپے ریکارڈ کیا گیا جو پیوستہ ہفتے کے مقابلے میں 11 ارب روپے کم ہے۔
پیوستہ ہفتے میں بینکوں کے ڈیپازٹس کا حجم 28 ہزار 564 ارب روپے ریکارڈ کیا گیا تھا ۔ جاری مالی سال کے آغاز سے لے کر اب تک بینکوں کے ڈیپازٹس میں مجموعی طور پر 5 فیصد کی کمی ریکارڈ کی گئی ہے۔
