واشنگٹن ۔31مارچ (اے پی پی):امریکی صدر ڈونلڈ ٹرمپ نے خبردار کیا ہے کہ اگر یوکرین کے ہم منصب ولادیمیر زیلنسکی معدنی حقوق کے معاہدے پر سرد مہری کا مظاہرہ کرتے ہیں تو انہیں ’بڑے مسائل‘ کا سامنا کرنا پڑے گا۔
فرانسیسی خبر رساں ادارے ’اے ایف پی‘ کی رپورٹ کے مطابق اپنے ایئر فورس ون جیٹ طیارے میں صحافیوں کو بریفنگ دیتے ہوئے صدر ٹرمپ نے کہا کہ میں دیکھ رہا ہوں کہ وہ (زیلنسکی) زمین میں دفن معدنیات کے اس نایاب معاہدے سے پیچھے ہٹنے کی کوشش کر رہے ہیں اور اگر وہ ایسے کریں گے تو انہیں کچھ مسائل کا سامنا کرنا پڑتا ہے، جو بڑے، بڑے مسائل ہوں گے۔
غیر ملکی خبر رساں ادارے ’رائٹرز‘ کے مطابق ٹرمپ انتظامیہ یوکرین کے ساتھ معدنیات کے حوالے سے آسان معاہدہ کرنے کی کوشش کر رہی ہے، معاہدے میں ابتدائی طور پر صرف یہ ذکر ہوگا کہ یوکرین کے وسیع معدنی وسائل کا امریکا کے پاس کتنا حصہ ہو گا بعد میں تفصیلی شرائط پر بات چیت کی جائے گی۔
یوکرین کے صدر ولادیمیر زیلنسکی نے اس سے ایک ہفتہ قبل تفصیلی امریکی تجویز کو مسترد کر دیا تھا، جس کے تحت واشنگٹن کو یوکرین کی 50 فیصد اہم معدنیات مل سکتی تھیں جن میں گریفائٹ، یورینیم، ٹائٹینیم اور لیتھیم شامل ہیں جو الیکٹرک کاروں کی بیٹری کے لیے لازمی جزو ہیں۔
Short Link: https://urdu.app.com.pk/urdu/?p=577579
