اسلام آباد۔16مئی (اے پی پی):وزیرداخلہ رانا ثناء اللہ خان نے کہا ہے کہ سابق وزیراعظم عمران خان نیازی امریکی سازش کی طرح اب مسلسل اپنی جان کو خطرے کابیانیہ بنارہے ہیں، ممکنہ خطرے سے متعلق اگر کوئی ٹھوس ثبوت سابق وزیراعظم کے پاس ہے تو اسے وزارت داخلہ سے فی الفورشئیرکریں،حکومت اس معاملے کی مکمل تحقیقات کروانے کیلئے تیارہے۔
پیر کو اپنے بیان میں وزیر داخلہ نے کہا کہ اگر عمران نیازی چاہیں تو اس معاملے پر ایک جوڈیشل کمیشن بھی قائم کرسکتے ہیں اورجوڈیشل کمیشن عمران نیازی کے فراہم کردہ شواہد اور معلومات کا جائزہ لےکر آزادانہ فیصلہ دے سکتا ہے۔ انہوں نے کہا کہ اگرعمران نیازی اپنی جان کو خطرے سے متعلق معلومات فراہم نہیں کرتے تو امریکی سازش کی طرح اس بیانیے کو بھی ایک پولیٹیکل سٹنٹ ہی تصور کیا جائیگا۔
انہوں نے کہا کہ ایک سابق وزیراعظم کا اپنی جان کے خطرے کو پولیٹیکل سٹنٹ کے طور پر پیش کرنا انتہائی افسوسناک ہے اور خطرے کا باعث ہوسکتا ہے۔انہوں نے مشورہ دیا کہ عمران نیازی اپنی سکیورٹی کو سیاسی پراپیگنڈے کے طور پر پیش نہ کرے، شواہد ہیں تو ہم سے شئیر کرے۔
