سافٹ کِل اور ہارڈ کِل سے اب تک 25 اسرائیلی ساختہ ہیروپ ڈرونز کو مار گرایا گیا ہے، آئی ایس پی آر

راولپنڈی۔8مئی (اے پی پی):افواج پاکستان کی سافٹ کِل (تکنیکی) اور ہارڈ کِل (ہتھیاروں) سے اب تک 25 اسرائیلی ساخت کے ہیروپ ڈرونز کو مار گرایا گیا ہے۔ آئی ایس پی آر کے مطابق بھارت کے 6/7 مئی کے بزدلانہ حملہ میں 5 جدید طیاروں، ڈرونز، متعدد پوسٹوں کے تباہ اور فوجی ہلاکتوں ہونے کے بعد، بھارت بوکھلاہٹ میں یہ اسرائیلی ساختہ ہیروپ ڈرونز سے پاکستان پر حملہ کر رہا ہے۔

یہ بزدلانہ حملہ بھارت کی پریشانی اور بھوکلاہٹ کی نشانی ہے۔ کنٹرول لائن پر بھی بھارت نے بھرپور نقصان اٹھایا اور اٹھا رہا ہے۔پاکستان کے مختلف علاقوں سے اسرائیلی ساختہ ہیروپ ڈرونز کا ملبہ اٹھایا جا رہا ہے۔ آئی ایس پی آر کا کہنا ہے کہ افواج پاکستان دشمن کو منہ توڑ جواب دے رہی ہیں اور اس کے تمام عزائم کو خاک میں ملا رہی ہیں۔

Short Link: https://urdu.app.com.pk/urdu/?p=594346