اسلام آباد۔22فروری (اے پی پی):ساف کراس کنٹری اتھلیٹکس چیمپئن شپ (کل) اتوار سے فاطمہ جناح پارک (ایف نائن)اسلام آباد میں ہوگی۔چیئرمین آرگنائزنگ کمیٹی بریگیڈیئر (ریٹائرڈ) سلطان محمود ستی نے سائوتھ ایشیاء اتھلیٹکس فیڈریشن کے چیئرمین میجر جنرل ریٹائرڈ محمد اکرم ساہی، پاکستان اتھلیٹکس فیڈریشن کے صدر بریگیڈیئر ریٹائرڈ وجاہت حسین، سیکرٹری جنرل کرنل ریٹائرڈ شاہجہان میر اور محمد راشد(سپانسر) کے ہمراہ پاکستان سپورٹس بورڈ میں پریس کانفرنس کرتے ہوئے بتایا کہ ایونٹ کے کامیاب انعقاد کو یقینی بنانے کیلئے تمام تر انتظامات مکمل کر لئے گئے ہیں،
انہوں نے کہا کہ چیمپئن شپ میں شائقینِ کی انٹری فری ہوگی۔ میجر جنرل ریٹائرڈ اکرم ساہی نے کہا کہ ساف کراس کنٹری ایتھلیٹکس چیمپئن شپ پہلی بار پاکستان میں منعقد ہو رہی ہے ،اس ایونٹ کا پاکستان میں منعقد ہونا پاکستانی عوام کے لئےاعزاز کی بات ہے۔ سلطان ستی نے کہا کہ چیمپئن شپ میں پانچ ممالک کے کھلاڑی حصہ لیں گے جن میں میزبان پاکستان کے علاوہ نیپال، سری لنکا، بنگلہ دیش اور مالدیپ شامل ہیں۔
چیمپئن شپ میں دو کیٹگریز کے مقابلے رکھے گئے ہیں جن میں مینز سینئر اینڈ انڈر 20 کے مقابلے شامل ہیں۔چیمپئن شپ میں انڈر 20 کے مقابلے 23 فروری کو دن دس بج شروع ہونگے یہ ریس 8 کلو میٹر پر مشتمل ہوگی۔ مینز سینئر کیٹگری کے مقابلے دن گیارہ بجے منعقد ہونگے۔ یہ ریس 10 کلو میٹر پر مشتمل ہوگی۔
Short Link: https://urdu.app.com.pk/urdu/?p=564861
