فیصل آباد۔ 03 ستمبر (اے پی پی):ڈیٹ پام ریسرچ انسٹی ٹیوٹ آری فیصل آباد کے ماہرین اثمار نے کہاکہ مارچ اور اپریل کے مہینوں میں کھجور کے درختوں پر لگنے والے پھول کے باعث ستمبرکے آغاز میں کھجور کاپھل پکنا شروع ہو جاتاہے جسے جدید ٹیکنالوجی کے استعمال سے 10 سال تک کیلئے ذخیرہ کیاجاسکتاہے۔انہوں نے بتایاکہ کھجور موسم گرما میں پک کر تیار ہوتی ہے اور جوں جوں گرمی کی شدت میں اضافہ ہوتاہے توں توں کھجور جلد سے جلد پک کر تیار ہونا شروع ہوجاتی ہے۔
انہوں نے کہا کہ کھجور ایک ایسا انمول تحفہ ہے جسے خشک کرکے بھی کئی سالوں کیلئے ذخیرہ کیاجاسکتاہے۔ انہوں نے بتایاکہ کھجور کی افادیت اپنی جگہ جبکہ کھجور کے درخت بھی بہت اہم خواص کے حامل ہوتے ہیں۔ انہوں نے بتایا کہ کھجورکے تنے میں گھاؤ لگایاجائے تو اس سے انتہائی لذیز اور خوشبودار مواد برآمدہوتا ہے۔ انہوں نے بتایاکہ اسے عموماً اس وقت پیاجاتاہے جب اسے نکالاجائے۔
انہوں نے کہاکہ اگر تنے سے نکلے ہوئے مواد کو ایک دن کیلئے رکھ دیاجائے تواگلے روز لذیز اور خوشبودار مواد مشروب کی صورت اختیار کر لیتاہے۔ انہوں نے کہاکہ کھجور کے پیڑ سے نکلنے والے گوند کو بیرونی چوٹوں کیلئے استعمال کیاجاتا ہے جبکہ گھٹنے پر بیرونی چوٹ کیلئے استعمال کی صورت میں بھی زبردست افاقہ حاصل ہوسکتاہے۔
