فیصل آباد۔ 03 ستمبر (اے پی پی):کماد کی کاشت کیلئے ستمبر کا پورا مہینہ موزوں ہے تاہم کاشتکار بیج کا انتخاب صحتمند، بیماریوں اور کیڑوں سے پاک فصل سے کریں۔نظامت زرعی اطلاعات محکمہ زراعت کے ماہرین نے کہا کہ بیج کیلئے گنے کے اوپر والا حصہ استعمال کیاجائے۔ انہوں نے کہاکہ کاشتکار فی ایکڑ چار آنکھوں والے 13سے 15ہزار سمے یا تین آنکھوں والے 17سے 20ہزار سمے ڈالیں نیز یہ تعداد گنے کی موٹائی کے لحاظ سے تقریباً 100تا 120من بیج سے حاصل کی جا سکتی ہے۔
انہوں نے کاشتکاروں کو اگیتی اقسام کیلئے سی پی ایف 243، ایچ ایس ایف 242، سی پی 77-400، سی پی ایف 237، ایچ ایس ایف 240 وغیرہ جبکہ درمیانی تیار ہونے والی اقسام کیلئے ایس پی ایف 213، سی پی ایف 246، سی پی ایف 247اور ایس پی ایف 245وغیرہ کاشت کرنے کی ہدایت بھی کی۔انہوں نے بتایاکہ کاشتکار کماد کی ستمبر کاشت کیلئے اقسام کے انتخاب کے وقت ان کی پیداواری صلاحیت، کیڑے اور بیماریوں کے خلاف قوت مدافعت کو مدنظر رکھیں۔
انہوں نے کہاکہ کاشتکار زمینوں میں نامیاتی مادہ کی کمی کے پیش نظر دیسی یا سبز کھاد کا استعمال کریں اور مصنوعی کھادوں کا استعمال زمین کے تجزیہ کی بنیاد پر کیا جائے۔ انہوں نے کہاکہ اس ضمن میں مزید رہنمائی، مشاورت یا معلومات کیلئے محکمہ زراعت کے فیلڈ سٹاف کی خدمات سے بھی استفادہ کیاجاسکتاہے۔
