اسلام آباد۔29ستمبر (اے پی پی):سپیکر قومی اسمبلی سردار ایاز صادق نے مولانا فضل الرحمان کو جمیعت علماء اسلام (ف) کا بلا مقابلہ مرکزی امیر اور مولانا عبدالغفور حیدری کو جنرل سیکرٹری منتخب ہونے پر مبارکباد دی ہے۔اتوار کو قومی اسمبلی سیکرٹریٹ کے ڈائریکٹوریٹ جنرل آف میڈیا کی طرف سے جاری بیان میں سپیکر سردار ایاز صادق نے مولانا فضل الرحمان اور مولانا عبدالغفور حیدری کیلئے نیک خواہشات کا بھی اظہار کیا اور کہا کہ مولانا فضل الرحمان ایک زیرک، مدبر، بردبار اور دور اندیش سیاسی رہنما ہیں ان کی سربراہی میں جے یو آئی نے ہمیشہ اصولوں پر مبنی سیاست کی ہے۔
انہوں نے کہا کہ مولانا فضل الرحمان کی سربراہی میں جے یو آئی (ف)عوام کی بہترین نمائندہ جماعت رہی ہے،مولانا فضل الرحمان کا بطور امیر جمعیت علمائے اسلام ف منتخب ہونا جمہوریت کیلئے اچھا شگون ہے۔ سردار ایاز صادق نے کہا کہ مولانا فضل الرحمان کا جے یو آئی (ف)کے بطور امیر انتخاب سے جمہوریت کو فروغ ملے گا،مولانا فضل الرحمان کی قیادت میں جمعیت علمائے اسلام نے پارلیمان کے اندر اور باہر ہمیشہ جمہوری اقدار پر مبنی سیاست کی ہے۔
انہوں نے کہا کہ پارلیمان کی بالادستی اور جمہوری اقدار کے فروغ کیلئے مولانا فضل الرحمان کا کردار قابل قدر ہے، امید ہے کہ جمیت علماء اسلام (ف) مولانا فضل الرحمان کی قیادت میں پارلیمان کی مضبوطی اور جمہوریت کی بالا دستی کیلئے اپنا مثبت کردار ادا کرتی رہے گی اورمولانا فضل الرحمان کی قیادت میں جمعیت علمائے اسلام مزید بلندیوں کی طرف گامزن ہو گی۔
