اسلام آباد۔3اپریل (اے پی پی):سپیکر قومی اسمبلی سردار ایاز صادق نےوزیراعظم شہبازشریف کی طرف سے بجلی کی قیمتوں میں بڑی کمی کا خیر مقدم کرتے ہوئے کہا ہے کہ گھریلو صارفین کےلئے 7 روپے 41 پیسے فی یونٹ اور صنعتی صارفین کے لئے 7 روپے 69 پیسے فی یونٹ کمی ایک غیر معمولی ریلیف ہے ۔ جمعرات کو اپنے ایک خیر مقدمی بیان میں انہوں نے کہا کہ یہ وزیراعظم اور ان کی ٹیم کا ایک تاریخی عوامی فیصلہ ہے ، اس فیصلے سے تمام صارفین کو بلا امتیاز فائدہ پہنچے گا، ملک کو معاشی بھنور سے نکالنے کے بعد عوام کو اتنا بڑا ریلیف تاریخ ساز اقدام ہے۔
سردار ایاز صادق نے کہا کہ وزیراعظم کے فیصلے سے ملک میں اب معاشی سرگرمیوں میں مزید تیزی آئے گی ، حکومت کے اس فیصلے سے سٹاک مارکیٹ میں بھی فوری بہتری آئی جو کاروباری طبقے کے اعتماد کی عکاس ہے۔ انہوں نے کہا کہ عوامی حلقوں سمیت کاروباری طبقات اور بزنس کمیونٹی نے بھی اس فیصلے کا خیر مقدم کیا ہے ،ملک کو درپیش چیلنجوں کے باوجود اتنا بڑا ریلیف وزیر اعظم کے عوام سے کئے گئے وعدوں کی تکمیل ہے ، بجلی کی قیمتوں میں کمی سے برآمدات میں اضافہ اور شرح نمو بڑھے گی ۔
Short Link: https://urdu.app.com.pk/urdu/?p=578268
