سرمایہ کاری،تجارت میں اضافہ اور وفود کے تبادلوں کی حوصلہ افزائی کررہے ہیں،گورنرسندھ

کراچی۔ 10 فروری (اے پی پی):گورنر سندھ کامران خان ٹیسوری نے کہا ہے کہ سرمایہ کاری،تجارت میں اضافہ اور بزنس وفود میں تبادلوں کی بھرپور حوصلہ افزائی کر رہے ہیں،اس ضمن میں ایس آئی ایف سی کے تحت بیرونی سرمایہ کاروں کو ہر ممکن سہولیات فراہم کی جا رہی ہیں۔جاری اعلامیہ کے مطابق ان خیالات کا اظہار انہوں نے گورنرہائوس میں ٹریڈ چیمپئن کے سی ای او راشد اقبال کی قیادت میں 4 رکنی وفد سے ملاقات میں گفتگو کرتے ہوئے کیا۔

وفد میں پاک بریٹن بزنس کونسل کے ممبران شامل تھے۔ملاقات میں تجارتی تعاون اور باہمی دلچسپی کے امور پر تبادلہ خیال کیا گیا۔پاک بریٹن بزنس کونسل کے وفد نے کہاکہ گورنر سندھ سے ملاقات برطانوی سرمایہ کاروں کے اعتماد میں اضافے کا باعث بنے گی۔کونسل نے یقین دہانی کرائی کہ وہ آئی ٹی اور تعلیمی منصوبوں میں اشتراک اور نئی جامعات کے قیام میں تعاون فراہم کریں گے۔کونسل نے گورنر سندھ کو دورہ لندن کی باضابطہ دعوت دی۔راشد اقبال نے کہا کہ گورنر انیشی ایٹیوز کے منصوبے قابل تقلید ہیں۔وفد نے گورنرہائوس میں آئی ٹی مارکی،راشن ڈرائیواور ”امید کی گھنٹی“ کا دورہ کیا۔وفد نے ” امید کی گھنٹی“ بجاکر خوشگوار حیرت کا اظہار کیا۔راشن ڈرائیوکے تحت مستحقین میں تقسیم ہونے والے راشن بیگ کا جائزہ بھی لیا۔

Short Link: https://urdu.app.com.pk/urdu/?p=558632