اسلام آباد۔29اگست (اے پی پی):وفاقی وزیرخزانہ ومحصولات سینیٹرمحمداورنگزیب نے نجی شعبے کی سرمایہ کاری کے لیے سازگار ماحول پیدا کرنے کے حوالہ سے حکومت کے عزم کااعادہ کرتے ہوئے کہاہے کہ سرمایہ کاری کے عمل کو ہموار کرنے اور اور غیر ملکی سرمایہ کاروں کو مراعات فراہم کرنے والی پالیسیاں مرتب کی جارہی ہے۔
انہوں نے یہ بات جمعرات کویہاں پاک برونائی انویسٹمنٹ کمپنی لمیٹڈ اور سعودی پاک انڈسٹریل اینڈ ایگریکلچرل انویسٹمنٹ کمپنی سمیت مشترکہ سرمایہ کاری کمپنیوں کے نمائندوں کے ساتھ جائزہ اجلاس کی صدارت کرتے ہوئے کہی ، اجلاس میں کمپنیوں کی پیشرفت، چیلنجز اور مستقبل کے منصوبوں کا جائزہ لیاگیا۔اجلاس میں دونوں کمپنیوں کی سینئر قیادت نے شرکت کی ۔ سی ای او پاک برونائی انویسٹمنٹ کمپنی لمیٹڈ (پی بی آئی سی ایل) نے کمپنی کے پورٹ فولیو اور پاکستان میں اہم اقدامات کے بارے میں مختصر جائزہ پیش کیا۔
انہوں نے وزیر خزانہ کو پاکستان اور برونائی کے درمیان اقتصادی تعاون کو فروغ دینے میں پی بی سی آئی ایل کے کردار کے بارے میں آگاہ کیا ۔ انہوں نے کہاکہ مالیاتی خدمات، رئیل سٹیٹ اور ایس ایم ای کی مدد کے ذریعے صنعت اور زراعت کے شعبوں میں سرمایہ کاری کی سہولت فراہم کی گئی ہے ، کمپنی نے ان شعبوں میں اہم پیشرفت کی ہے اوراس کے نتیجہ میں دوطرفہ تجارت اور اقتصادی استحکام کو فروغ مل رہاہے۔
سی ای او سعودی پاک انڈسٹریل اینڈ ایگریکلچرل انویسٹمنٹ کمپنی نے ملک میں اسلامی مالیات ، ڈیجیٹل فنانس، تجارت، زراعت اور لائیو سٹاک کے فروغ کے لیے کمپنی کے اہم ترقیاتی اقدامات کے بارے میں پریذنٹیشن بھی دی۔ اجلاس میں ان کمپنیوں کے آپریشنز کے مختلف پہلوئوں بشمول سرمایہ کاری کی حکمت عملی، کارکردگی کی جانچ اور بعض رکاوٹوں پر بھی تبادلہ خیال کیا گیا ۔
دونوں کمپنیوں نے اپنی کامیابیوں اور چیلنجوں کاجائزہ پیش کیا اور آپریشنل رکاوٹوں کو دور کرنے کیلئے پالیسی سپورٹ کی ضرورت پرزوردیا۔ وزیر خزانہ نے دونوں کمپنیوں کے کردار کوسراہا۔ ، انہوں نے کہاکہ چند برسوں میں اہداف کے حصول کے حوالہ سے سعودی عرب کا وژن 2030 لائق تحسین ہے اور پاکستان اس حوالہ سے سعودی عرب کے تجربات سے استفادہ کرسکتاہے ۔
وزیرخزانہ نے کہاکہ حکومت نجی شعبے کی سرمایہ کاری کے لیے سازگار ماحول پیدا کرنے میں پرعزم ہے ، انہوں نے براہ راست غیر ملکی سرمایہ کاری کو راغب کرنے میں دونوں کمپنیوں کے کردار اور منصوبوں کی اہمیت پر زور دیا۔ انہوں نے کہاکہ سرمایہ کاری کے عمل کو ہموار کرنے اور اور غیر ملکی سرمایہ کاروں کو مراعات فراہم کرنے والی پالیسیاں مرتب کی جارہی ہے۔
Short Link: https://urdu.app.com.pk/urdu/?p=498575
