سرگودھا۔ 05 جولائی (اے پی پی):سرگودھا پولیس کی جانب سے 10 محرم الحرام یوم عاشورہ کا سیکیورٹی پلان جاری کردیا گیا ہے۔ اس حوالے سے ڈسٹرکٹ پولیس آفیسر سرگودہا محمد صہیب اشرف نے کہا کہ 10 محرم الحرام کو سرگودھا پولیس کے ساڑھے چار ہزار جوان ڈیوٹی سر انجام دیں گے جس کی نگرانی ڈی پی او سرگودہا محمد صہیب اشرف خود کریں گے ۔
ضلع بھر میں 10محرم الحرام کے 214 جلوس نکالے جائیں گے جس میں کیٹگری A کے 27 ، B کے 32 جبکہ C کے 133 جلوس نکالے جائیں گے جلوسوں کے علاوہ 224 مجالس بھی منعقد ہوں گی۔ مجالس کی سیکیورٹی پر 1000 اہلکار مامور کیے گئے ہیں۔ ڈی پی او نے کہا کہ حساس اور اہم مقامات پر ایلیٹ کی ٹیمیں گشت پر مامور کی گئی ہیں۔ جلوس مجالس کے تمام پروگراموں پر ایک سو سے زائد خواتین پولیس اہلکار بھی تعینات کی گئی ہیں۔
انہوں نے کہا کہ سرگودھا شہر میں تین جلوس برآمد ہوں گے جو بعد میں اکٹھے ہو کر مرکزی جلوس کی شکل اختیار کر لیں گے ایک جلوس پانچ بلاک، دوسرا 19 بلاک جبکہ تیسرا مقام حیات سےبرآمدہوگا تینوں جلوس گول چوک اکٹھے ہو کر مرکزی جلوس کی شکل اختیار کر لیں گے۔ جلوسوں کے راستوں کو خاردار تاروں سے بند کیا گیا ہے صرف مخصوص راستوں سے جلوس میں داخل ہونے کی اجازت دی جائے گی۔
تمام جلوسوں کو تین حصار میں سیکیورٹی فراہم کی جائے گی۔ ڈی پی او نے بتایا کہ اس کے علاؤہ سی سی ٹی وی کیمروں سے سیکیورٹی انتظامات کو فول پروف بنایا گیا ہے۔ قبل ازیں تمام راستوں کی سرچ سویپنگ بھی کروائی گئی ہے۔
