ریاض ۔2ستمبر (اے پی پی):سعودی عرب کی کنگ عبدالعزیز سِٹی فار سائنس اینڈ ٹیکنالوجی اور دا یونیورسٹی آف کیلفورنیا، سان ڈیاگو کی مشترکہ تحقیقی ٹیم نے ایک ایسا کیپسول تیار کیا ہے جس کے مختلف خانوں میں وہ تمام دوائیں آ سکتی ہیں جن کی کسی مریض کو پورے دن میں ضرورت ہوسکتی ہے۔
سعودی پریس ایجنسی ایس پی اے کے مطابق کیپسول کے ڈیزائن میں مریضوں کو دوا دینے کا ایک ایسا نظام ایک ہی یونٹ میں موجود ہے جس سے وہ مریض جن کو دن میں کئی ادویات کی ضرورت ہوتی ہے، استفادہ کر سکیں گے ۔ایس پی اے نے بتایا کہ یہ نئی تکنیک وقت پر دوا دینے میں معاون اور دوا کی تاثیر میں اضافہ کرے گی جس سے کسی بھی مریض کے لیے ذاتی فریم ورک کے اندر رہتے ہوئے بہتر نتائج نکلیں گے۔
اس ایجاد کی بناوٹ، استعمال اور فروخت کا اختیار امریکہ کے پاس ہوگا جس میں چھوٹی چھوٹی رکاوٹیں یا بیریئرز ہوں گے جو مختلف دواؤں کو الگ الگ رکھیں گے تا کہ وہ ایک ایک کر کے مریض کے خون میں شامل ہوں۔کیپسول کے بعض حصے اپنے نظام کو تبدیل کر کے دوا کو کسی بھی وقت ریلیز کریں گے جس سے درد میں افاقہ ہوگا یا فوری ضرورت کی صورت میں مریض کو دوا مل جائے گی۔
کیپسول سے دواؤں کے ایک دوسرے کے ساتھ تعامل میں بھی کمی ہوگی، دوا لینے میں بھول سے چھٹکارا ملے گا اور ضرورت سے زیادہ دوا لینے کا خطرہ کم ہو جائے گا۔کیپسول سے ایسے مریضوں کے لیے جن کی بیماری پرانی ہے یا جنھیں دل کی تکلیف ہے، ایک وقت پر کئی دوا لینے کے طریقے میں تبدیلی آ جائے گی اور تھیراپی کا عمل بہتر، آسان اور موثر ہوجائے گا۔ کیپسول کی ایجاد جو وژن 2030 کے مقاصد سے ہم آہنگ ہے، ہیلتھ کیئر اور ادویات پر آنے والے اخراجات میں بیس فیصد تک کمی کر سکتی ہے۔
جبکہ ہپستال میں علاج معالجے کی لاگت آٹھ فیصد کم ہو سکتی ہے۔ ریسرچ ٹیم اب ضابطوں کے طریقِ کار مکمل کر رہی ہے جس کے بعد ابتدائی کلینیکل ٹیسٹ شروع ہوں گے جس سے اس کیپسول کی افادیت کی تصدیق ہوگی اور معلوم ہو گا کہ اس کا استعمال کتنا محفوظ ہے۔
