اسلام آباد۔4جولائی (اے پی پی):پاکستان میں سعودی عرب کے سفیر نواف بن سعید المالکی نے کہا ہے کہ سعودی عرب اور پاکستان کے درمیان تعلقات بھائی چارے، محبت اور اعتماد پر مبنی ہیں، سعودی عرب نے ہر مشکل وقت میں پاکستان کا ساتھ دیا ہے ، کنگ سلمان ریلیف سینٹر دنیا بھر میں انسانی فلاح و بہبود کے لیے سرگرمِ عمل ہے جس میں پاکستان بھی نمایاں طور پر شامل ہے۔
ان خیالات کا اظہار انہوں نے پاکستان میں خوراک کی فراہمی کے لیے کنگ سلمان ریلیف سینٹر کے امدادی منصوبے کے تیسرے مرحلے کا باضابطہ افتتاح کرتے ہوئے کیا۔وفاقی وزیر برائے قومی غذائی تحفظ و تحقیق رانا تنویر حسین تقریب کے مہمانِ خصوصی تھے۔ جمعہ کو یہاں جاری پریس ریلیز کے مطابق سعودی عرب نے پاکستان میں خوراک کی فراہمی کے لیے امدادی منصوبے کے تیسرے مرحلے کا آغاز کر دیا ہے جس کے تحت ملک بھر کے مستحق خاندانوں میں 30 ہزار فوڈ باسکٹس تقسیم کی جائیں گی۔یہ اقدام مملکتِ سعودی عرب کے انسانی امداد کے ادارے "کنگ سلمان ریلیف سینٹر” کے تعاون سے پاکستان کی وفاقی اور صوبائی حکومتوں کے اشتراک سے عمل میں لایا جا رہا ہے۔
اسلام آباد میں منعقدہ تقریب میں سعودی عرب کے سفیر نواف بن سعید المالکی نے منصوبے کا باضابطہ افتتاح کرتے ہوئے فوڈ باسکٹس حوالے کیں۔ انہوں نے اس موقع پر خطاب کرتے ہوئے کہا کہ سعودی عرب اور پاکستان کے درمیان تعلقات بھائی چارے، محبت اور اعتماد پر مبنی ہیں اور مجھے اس باوقار تقریب میں مملکتِ سعودی عرب کی نمائندگی کرتے ہوئے خوشی محسوس ہو رہی ہے۔
انہوں نے کہا کہ یہ منصوبہ خادمِ حرمین شریفین شاہ سلمان بن عبدالعزیز اور ولی عہد شہزادہ محمد بن سلمان کی پاکستانی عوام سے بے لوث محبت اور ہمدردی کا مظہر ہے۔انہوں نے کہا کہ سعودی عرب نے ہر مشکل وقت میں پاکستان کا ساتھ دیا ہے ، کنگ سلمان ریلیف سینٹر دنیا بھر میں انسانی فلاح و بہبود کے لیے سرگرمِ عمل ہے جس میں پاکستان بھی نمایاں طور پر شامل ہے۔
اس موقع پر وفاقی وزیر رانا تنویر حسین نے سعودی عرب کے فراخدلانہ تعاون پر شکریہ ادا کیا اور دونوں ممالک کے مابین قریبی تعلقات کو سراہا۔تقریب کا اختتام پاکستان اور سعودی عرب کے درمیان مزید مضبوط تعلقات، امن و خوشحالی کے لیے خصوصی دعا کے ساتھ ہوا۔سعودی سفیر نے آخر میں عربی اور اردو زبان میں "پاکستان سعودیہ دوستی زندہ باد‘‘ کا نعرہ بھی لگایا۔
