اسلام آباد۔13دسمبر (اے پی پی):سعودی عرب میں مقیم پاکستانیوں کی جانب سے ترسیلات زرملک ارسال کرنے کی شرح میں جاری مالی سال کے پہلے پانچ مہینوں میں گزشتہ مالی سال کے اسی عرصہ کے مقابلہ میں 28.2 فیصد کانمایاں اضافہ ہواہے۔سٹیٹ بینک کے اعدادوشمارکے مطابق جولائی تانومبر2020 تک کی مدت میںسعودی عرب میں مقیم پاکستانیوںنے 3.330 ارب ڈالرکازرمبادلہ ملک ارسال کیا جو گزشتہ مالی سال کے اسی عرصہ کے مقابلہ میں 28.2 فیصدزیادہ ہے، گزشتہ مالی سال کی اسی مدت میں سعودی عرب میں کام کرنے والے پاکستانیوں نے 2.597 ارب ڈالرکازرمبادلہ ملک ارسال کیا تھا، نومبر2020 میں سعودی عرب میں مقیم پاکستانیوں نے 615.1 ملین ڈالرکازرمبادلہ ملک ارسال کیا، گزشتہ سال نومبرمیں سعودی عرب میں مقیم پاکستانیوں نے 490.8 ملین ڈالرمالیت کازرمبادلہ ملک ارسال کیاتھا۔واضح رہے کہ موجودہ حکومت کی جانب سے قانونی زرائع سے ترسیلات زرملک ارسال کرنے کیلئے ترغیبات اورسہولیات دینے کے نتیجہ میں سمندرپارپاکستانیوں کی جانب سے ترسیلات میں مسلسل اضافہ ہورہاہے۔ سمندرپارمقیم پاکستانیوں کی جانب سے جاری مالی سال کے پہلے پانچ ماہ میں ترسیلات زرملک ارسال کرنے کی شرح میں گزشتہ مالی سال کے اسی عرصہ کے مقابلہ میں مجموعی طورپر 26.9 فیصد کانمایاں اضافہ ریکارڈکیاگیاہے۔ جولائی سے نومبر2020 تک کی مدت میں سمندرپارپاکستانیوں نے 11.769 ارب ڈالرکازرمبادلہ ملک ارسال کیا جوگزشتہ مالی سال کے اسی عرصہ کے مقابلہ میں 26.9 فیصدزیادہ ہے، گزشتہ مالی سال کے پہلے پانچ ماہ میں سمندرپارپاکستانیوں نے 9.275 ارب ڈالرکازرمبادلہ ملک ارسال کیاتھا۔
