ریاض۔5اپریل (اے پی پی):سعودی عرب نے فلسطین میں اسرائیلی حملوں کی مذمت کرتے ہوئے اسے عالمی قوانین کی صریح خلاف ورزی قرار دیا ہے۔اردو نیوز کے مطابق سعودی وزارت خارجہ کی جانب سے جاری مذمتی بیان میں کہا گیا ہے کہ اسرائیلی قابض فورسز کی جانب سے غزہ میں پناہ گزینوں کے مقامات کو نشانہ بنایا گیا جن میں مدرسہ دارالارقم بھی شامل ہے جہاں معصوم شہریوں نے پناہ لے رکھی تھی۔اسرائیلی قابض فورسز کے حملوں میں دسیوں معصوم شہری شہید ہوئے۔
وزارت خارجہ نے رفح کے مشرق میں موراج کے علاقے میں سعودی عرب کے ثقافتی مرکزجہاں زخمیوں اور بیماروں کی ضرورت کے لیے طبی اشیا رکھی جاتی ہیں پر اسرائیلی فورسز کے حملے کی مذمت کی ہے۔وزارتِ خارجہ نے کہا کہ بین الاقوامی قوانین کی صریح خلاف ورزیوں پر عالمی سطح پر اسرائیل کا سنجیدگی سے محاسبہ نہ کیے جانے کے باعث قابض فورسز کی جانب سے تباہ کن خلاف ورزیوں میں اضافہ ہو رہا ہے جس سے علاقائی اور عالمی امن، سلامتی اور استحکام کو شدید خطرہ لاحق ہے۔
سعودی عرب کی جانب سے بین الاقوامی برادری اور خاص طور پر سلامتی کونسل کے رکن ممالک سےمطالبہ کیا گیا کہ وہ اسرائیل کی جانب سے جاری خلاف ورزیوں کا سنجیدگی سے نوٹس لیں تاکہ فلسطینی عوام کو درپیش مشکلات کا ازالہ کیا جا سکے۔
Short Link: https://urdu.app.com.pk/urdu/?p=578626
