روم۔7مئی (اے پی پی):سعودی عرب کے وزیر صنعت و معدنی وسائل بندر الخریف نے اٹلی میں ایئربس ہیلی کاپٹرز کمپنی کے صدر دفتر میں چیف ایگزیکٹیو آفیسر برونو ایون کے ساتھ ملاقات کی اور مشترکہ سرمایہ کاری کے مواقع پر تبادلہ خیال کیا۔ العربیہ اردو کے مطابق یہ مواقع ہیلی کاپٹرز کی تیاری اور مرمت کے شعبے سے متعلق ہیں۔ دونوں رہنمائوں نے ہوابازی کی صنعت کے شعبے میں تعاون کو فروغ دینے اور ہیلی کاپٹرز کی تیاری و مرمت کے میدان میں مشترکہ مواقع پر بھی بات چیت کی۔
اس دوران سعودی وزیر نے کمپنی کے مختلف کارخانوں اور تنصیبات میں طیارہ سازی کی جدید ٹیکنالوجی کا مشاہدہ کیا۔ سعودی وزیر صنعت و معدنی وسائل اور کمپنی کے چیف ایگزیکٹیو آفیسر کے درمیان ہونے والی ملاقات میں گفتگو کا مرکز سعودی وژن 2030 کے اہداف تھے جن کا مقصد اقتصادی تنوع ، نجی شعبے کو با اختیار بنانا اور بین الاقوامی شراکت داریوں کے قیام پر خصوصی توجہ ہے۔ملاقات میں سعودی عرب کی سٹریٹجک صلاحیتوں اور صنعتی سرمایہ کاری کو اپنی طرف متوجہ کرنے والی مسابقتی خوبیوں پر بھی روشنی ڈالی گئی،
ان میں سرفہرست اس کا جغرافیائی محل وقوع (جو تین براعظموں کو آپس میں جوڑتا ہے)، قدرتی وسائل کی فراوانی، مسابقتی توانائی کی قیمتیں، جدید بنیادی ڈھانچہ، ترقی یافتہ صنعتی شہر اور حکومتی امور کی انجام دہی میں آسانیاں شامل ہیں۔ مملکت نے ہوابازی کی صنعت کے کلیدی شعبوں میں 10 ارب ریال سے زیادہ کی سرمایہ کاری کے مواقع متعین کیے ہیں جن میں مرمت، دیکھ بھال اور آپریشن ( ایم آر او ) کی خدمات، بغیر پائلٹ طیاروں کی تیاری اور دقیق خودکار مشیننگ شامل ہے۔
Short Link: https://urdu.app.com.pk/urdu/?p=593759
