ریاض ۔4جولائی (اے پی پی):سعودی عرب کے ولی عہد اور وزیر اعظم شہزادہ محمد بن سلمان بن عبدالعزیز آل سعود سے آج ابوظہبی کے نائب حکمران اور قومی سلامتی کے مشیر، عزت مآب شیخ طحنون بن زاید النہیان نے جدہ میں ملاقات کی۔وام نیوز کے مطابق ملاقات کے آغاز میں شیخ طحنون بن زاید نے متحدہ عرب امارات کے صدر، عزت مآب شیخ محمد بن زاید النہیان کی جانب سے نیک خواہشات اور سعودی عرب کے لیے مسلسل ترقی و خوشحالی کی تمناؤں کا پیغام پہنچایا۔جواباً،
شہزادہ محمد بن سلمان نے شیخ محمد بن زاید کو اپنی طرف سے سلام اور متحدہ عرب امارات کی ترقی اور خوشحالی کے لیے نیک تمناؤں کا اظہار کیا۔شیخ طحنون بن زاید نے گفتگو کرتے ہوئے کہا کہ یہ ملاقات دونوں برادر ممالک کی قیادتوں کے درمیان جاری مشاورت کے سلسلے کی ایک کڑی ہے، جو کہ علاقائی سلامتی و استحکام اور حالیہ پیش رفت سے متعلق باہمی رابطہ کاری پر مرکوز ہے۔
انہوں نے مزید کہا کہ متحدہ عرب امارات عرب دنیا کے اجتماعی اور دوطرفہ تعاون کی اہمیت پر یقین رکھتا ہے اور موجودہ چیلنجز سے نمٹنے، ساتھ ہی خطے کے مستقبل اور پائیدار ترقی کو یقینی بنانے کے لیے مسلسل رابطے کو ضروری سمجھتا ہے۔ملاقات کے دوران دونوں رہنماؤں نے اہم اور اسٹریٹجک شعبوں میں دوطرفہ شراکت داری کو مزید مستحکم بنانے کے امکانات پر تبادلہ خیال کیا، تاکہ خطے میں خوشحالی اور ترقی کو فروغ دیا جا سکے۔
