ریاض۔9جولائی (اے پی پی):سعودی عرب کی کابینہ نے ولی عہد شہزادہ محمد بن سلمان کی زیرصدارت جدہ میں ہونے والے اجلاس میں غیرملکیوں کو ملک میں جائیداد کی ملکیت کا حق دینے کے نئے قانون کی منظوری دے دی۔العربیہ اردو کے مطابق اجلاس کے دوران ولی عہد نے انڈونیشیا کے صدر برابوو سوبيانتو سے ہونے والی باضابطہ ملاقات اور جرمن چانسلر فریڈرِش میرٹز سے موصولہ ٹیلیفونک رابطے کی تفصیلات سے کابینہ کو آگاہ کیا۔
اسی ضمن میں سعودی انڈونیشیائی رابطہ کونسل کے پہلے اجلاس میں حاصل ہونے والے نتائج کو سراہا گیا، جنہوں نے دونوں ممالک کے مابین مضبوط تعلقات اور ان کے فروغ کے عزم کو نمایاں کیا۔ ساتھ ہی صاف توانائی، پیٹروکیمیکل صنعت، ایوی ایشن فیول سروسز سمیت کئی شعبوں میں نجی اداروں کے مابین معاہدوں اور مفاہمتی یادداشتوں پر دستخط کا خیرمقدم کیا گیا۔
اجلاس کے بعد وزیر اطلاعات کے قائم مقام، ڈاکٹر عصام بن سعید نے بتایا کہ کابینہ نے عالمی معیشت کے استحکام اور ترقی کے لیے سعودی عرب کی کوششوں پر بھی گفتگو کی، جن میں اوپیک پلس کے رکن ممالک سے تعاون اور ہم آہنگی جاری رکھنا شامل ہے تاکہ تیل منڈیوں میں توازن برقرار رکھا جا سکے۔
کابینہ نے اس بات پر بھی مسرت کا اظہار کیا کہ سعودی عرب نومبر میں اقوام متحدہ کی صنعتی ترقی کی تنظیم (یونیدو) کی 21ویں جنرل کانفرنس کی میزبانی کرے گا، اس کا مقصد پائیدار صنعتی ترقی، جدیدیت اور تکنیکی منتقلی سے متعلق عالمی چیلنجز کے لیے مشترکہ حل پیش کرنا ہے۔
