نیویارک ۔14دسمبر (اے پی پی):وزیر خارجہ بلاول بھٹو زرداری نے اقوام متحدہ کی سلامتی کونسل پر زور دیا ہے کہ وہ مسئلہ کشمیر پر اپنی قراردادوں پر عمل درآمد کو یقینی بناتے ہوئے خطے میں امن کے فروغ کے لیے اپنے عزم کو پورا کرے، اقوام متحدہ کی جنرل اسمبلی کو سب بڑے عالمی فورم کی حیثیت سے دنیا میں کثیرالجہتی کو تقویت دینے اور بین الاقوامی تعلقات میں مساوات اور انصاف کو بڑھانے میں مرکزی کردار ادا کرنا چاہیے۔
سلامتی کونسل میں "بین الاقوامی امن اور سلامتی "اصلاح شدہ کثیرالجہتی” کے موضوع پر اظہار خیال کرتے ہوئے وزیر خارجہ نے کہا کہ مسئلہ کشمیر اقوام متحدہ کی سلامتی کونسل کا ایک ایسا ایجنڈا آئٹم ہے جو اب بھی حل طلب ہے ۔ ہم اسے ایک کثیر القومی ایجنڈا مانتے ہیں اور اگر آپ کثیرالجہتی ادارے یا کثیرالجہتی کی کامیابی اور اس کونسل کی کامیابی دیکھنا چاہتے ہیں، تو یقینا آپ اس عمل میں مدد کر سکتے ہیں، اقوام متحدہ کی سلامتی کونسل کی قراردادوں پر عملدرآمد کیا جائے، جب کشمیر کا سوال ہو تو ثابت کریں کہ کثیرالجہتی کامیاب ہو سکتی ہے، ثابت کریں کہ سلامتی کونسل کامیاب ہو سکتی ہے اور خطے میں امن قائم کر سکتی ہے۔ انہوں نے کہا کہ پاکستان سمجھتا ہے کہ اقوام متحدہ اور سلامتی کونسل اور جنرل اسمبلی کو مزید جمہوری بنانے سے اس ادارے کو بااختیار بنایا جا سکے گا اور اسے کام کرنے کا اخلاقی اختیار ملے گا۔
انہوں نے کہا کہ یہ اقوام متحدہ کے مقاصد کو پورا نہیں کرتا ہے کہ وہ سلامتی کونسل میں مزید اراکین کو شامل کرے اور اس کی ویٹو کی طاقت کو بڑھا دے۔ وزیر خارجہ نے کہا کہ دنیا کی توجہ موسمیاتی تبدیلی، جوہری خطرات ، دہشت گردی، مہاجرین اور نقل مکانی، قحط اور بھوک جیسے متعدد عالمی خطرات اور چیلنجوں سے نمٹنے پر مرکوز ہونی چاہیے جن کا ہم سامنا کر رہے ہیں۔ انہوں نے مزید کہا کہ اس کے ساتھ ہی ہمیں انتہا پسندی اور نسلی اور مذہبی عدم برداشت کے نظریات کا مقابلہ کرنا چاہیے جس میں اسلامو فوبیا بھی شامل ہے جو بعض ممالک میں کمزور اقلیتوں کے خلاف امتیازی سلوک اور تشدد، اور یہاں تک کہ نسل کشی کے خطرات بھی پیدا کرتا ہے۔
وزیرخارجہ بلاول نے کہا کہ کثیرالجہتی کی بنیاد اقوام متحدہ کے چارٹر کے تحت لوگوں کا حق خود ارادیت، طاقت کا عدم استعمال، ریاستوں کی خودمختاری اور علاقائی سالمیت اور ان کے اندرونی معاملات میں عدم مداخلت جیسے بنیادی اصولوں کی ہمہ گیر اور مستقل پاسداری پر ہونی چاہیے۔ انہوں نے مزید کہا کہ اقوام متحدہ کی جنرل اسمبلی کو کثیرالجہتی کو تقویت دینے اور بین الاقوامی تعلقات میں مساوات اور انصاف کو بڑھانے میں مرکزی کردار ادا کرنا چاہیے۔
انہوں نے کہا کہ اقوام متحدہ کے تمام اہم اداروں: جنرل اسمبلی، سلامتی کونسل، اقتصادی اور سماجی کونسل، انسانی حقوق کونسل، بین الاقوامی عدالت انصاف، سیکرٹری جنرل اوراقوام متحدہ کے سیکرٹریٹ کو بااختیار بنانا اور انہیں موثر طریقے سے استعمال کرنا بہت ضروری اور ناگزیر ہے۔بلاول بھٹو نے کہا کہ دنیا کی توجہ بھی تنگ نظری پر مبنی قومی عزائم سے ہٹ کرکثیرالجہتی اور اجتماعی طور پر سامنے آنی چاہیے، سب سے پہلے اور سب سے اہم وجودی خطرات جن کا انہیں نسل انسانی کے طور پر سامنا ہے، خواہ وہ کووڈ وبائی بیماری کی شکل میں ہو، چاہے وہ موسمیاتی تبدیلی کی شکل میں ہو یا جوہری خطرے کے مسائل، دہشت گردی ، تنگ نظری پاپولزم، آمریت کا بڑھتاہوارجحان ہو ، ہمیں نفرت، زینو فوبیا، پاپولسٹ انتہا پسندی، نسلی اور مذہبی عدم برداشت کے نظریات کے عروج کا مقابلہ کرنا چاہیے، جس میں اسلامو فوبیا بھی شامل ہے، جو امتیازی سلوک اور تشدد، اور یہاں تک کہ بعض ممالک میں کمزور اقلیتوں کی نسل کشی کے خطرات کو مسلط کرتا ہے۔
وزیر خارجہ نے یاد دلایا کہ عالمی نظم و ضبط، امن اور استحکام کو فروغ دینے کی ان کی کوششیں اس وقت تک رائیگاں نہیں جائیں گی جب تک کہ وہ چارٹر کے دوسرے مقصد یعنی عالمی سماجی و اقتصادی ترقی کو حاصل نہیں کر لیتے ۔انہوں نے مزید کہا کہ کووِڈ کی وبائی بیماری، بڑھتے ہوئے تنازعات اور موسمیاتی تبدیلی کے زیادہ بار بار اور شدید اثرات کے نتیجے میں، تقریبا ایک سو ترقی پذیر ممالک انتہائی معاشی بدحالی کا شکار ہیں ۔
وزیر خارجہ نے کہا کہ جی 77 کے چیئر کی حیثیت سے وہ کثیرالجہتی کے وسیع ایجنڈے پر عمل پیرا رہیں گے۔گروپ آف 77 کی پاکستان اور چین کی سربراہی کے دوران، مصر میں کوپ 27 کے دوران، انہوں نے ترقی پذیر دنیا کے لیے کثیرالجہتی کی کامیابی دیکھی۔ انہوں نے مزید کہا کہ ہم نے تباہی اور نقصانات کو پورا کرنے کی فنڈنگ کی سہولت میں اضافے کے ساتھ موسمیاتی انصاف کی جیت دیکھی۔
