اسلام آباد۔20اپریل (اے پی پی):صدر مملکت آصف علی زرداری نے کہا ہے کہ آج ہم علامہ اقبال کی سیاسی اور فکری خدمات کو خراج تحسین پیش کرتے ہیں، علامہ اقبال کے افکار، فلسفہ اور شاعری ہمارے لیے مشعل راہ ہے، سماجی، معاشی اور فکری چیلنجز کے پیشِ نظر ہمیں اقبال کی تعلیمات کو مشعلِ راہ بنانا ہوگا ، ہمیں اپنی انفرادی و قومی زندگی میں پیغامِ اقبال پر عمل پیرا ہونے کی ضرورت ہے۔
ایوانِ صدر کے پریس ونگ کے مطابق صدر مملکت آصف علی زرداری نے علامہ اقبال کے یومِ وفات کے موقع پر اپنے پیغام میں کہا کہ آج ہم شاعرِ مشرق اور مفکرِ پاکستان علامہ محمد اقبال کا یومِ وفات عقیدت و احترام سے منا رہے ہیں، ہم علامہ اقبال کی سیاسی اور فکری خدمات کو خراج تحسین پیش کرتے ہیں۔
صدر مملکت نے کہا کہ علامہ اقبال کے افکار، فلسفہ اور شاعری ہمارے لیے مشعل راہ ہے، ہمیں اپنی انفرادی و قومی زندگی میں پیغامِ اقبال پر عمل پیرا ہونے کی ضرورت ہے، صدر مملکت نے کہا کہ علامہ اقبال محض ایک شاعر نہ تھےبلکہ وہ ایک مفکر اور مصلح بھی تھے، علامہ اقبال نے ملتِ اسلامیہ کے زوال کا درد محسوس کیا اور امت کو بیدار کرنے کے لیے اپنے افکار و اشعار کو ذریعہ بنایا۔
صدر مملکت نے کہا کہ علامہ اقبال کی شاعری خودی، اجتہاد، عشق حقیقی ، حریتِ فکر اور ملت کی نشاط ثانیہ جیسے تصورات پر محیط ہے۔ صدر آصف علی زرداری نے کہا کہ اقبال کے نزدیک امتِ مسلمہ کی نجات صرف سیاسی آزادی میں نہیں بلکہ فکری و روحانی بیداری میں مضمر ہے، علامہ اقبال نے مسلمانوں کو علم، بصیرت، خوداعتمادی اور دینِ حق کے اصل پیغام کی طرف بلایا، علامہ اقبال نے برصغیر کے مسلمانوں کی سیاسی سمت کے تعین میں بھی بنیادی کردار ادا کیا۔
صدر مملکت نے کہا کہ علامہ اقبال نے1930 کے خطبہ الہ آباد میں برصغیر کے مسلمانوں کے لیے علیحدہ ریاست کا تصور پیش کیا، علامہ اقبال کی سیاسی سوچ مسلمانوں کی جداگانہ شناخت کی عکاس تھی۔ صدر مملکت نے کہا کہ سماجی، معاشی اور فکری چیلنجز کے پیشِ نظر ہمیں اقبال کی تعلیمات کو مشعلِ راہ بنانا ہوگا، آئیے عہد کریں کہ علامہ اقبال کی تعلیمات اور فکر پر عمل پیرا ہوں گے، عہد کریں کہ پاکستان کو ایک ایسا ملک بنائیں گے جہاں تمام شہریوں کو آزادی، سماجی و معاشی انصاف اور ترقی کے یکساں مواقع میسر ہوں۔
Short Link: https://urdu.app.com.pk/urdu/?p=584809
