حیدرآباد۔ 23 فروری (اے پی پی):سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ سندھ حکومت عوامی خدمت کے لیے ہر ممکن اقدامات کر رہی ہے اور ہماری کوشش ہے کہ ترقیاتی کاموں کو تیز تر کیا جائے تاکہ عوام کو زیادہ سے زیادہ سہولیات فراہم کی جا سکیں۔
ان خیالات کا اظہار انہوں نے راول ہاؤس ٹنڈو جام کے کمیٹی روم میں بلدیاتی اداروں کے چیئرمین اور وائس چیئرمینز کے اجلاس کی صدارت کرتے ہوئے کیا۔ اجلاس میں ڈپٹی کمشنر حیدرآباد زین العابدین میمن، ڈویژنل ڈائریکٹر انفارمیشن ارشاد علی چانڈیو، ماروی سومرو، تعلقہ ٹنڈو جام کے بلدیاتی چیئرمین اور وائس چیئرمینز نے شرکت کی۔
سینئر وزیر شرجیل انعام میمن نے تمام چیئرمینز کو ہدایت کی کہ سندھ حکومت کی جانب سے فراہم کردہ فنڈز کو مکمل شفافیت اور دیانتداری کے ساتھ عوامی فلاح و بہبود کے منصوبوں پر خرچ کیا جائے۔ انہوں نے کہا کہ جو چیئرمینز ترقیاتی فنڈز کا درست اور مؤثر استعمال کریں گے، انہیں حکومت کی مکمل حمایت حاصل ہوگی۔
انہوں نے مزید کہا کہ وزیراعلیٰ سندھ کی واضح ہدایات ہیں کہ لوکل گورنمنٹ کے فنڈز کو عوامی منصوبوں میں لگا کر لوگوں کے مسائل حل کیے جائیں اور ترقیاتی کاموں کو جلد مکمل کیا جائے تاکہ عوام کو ان کے ثمرات پہنچ سکیں۔ شرجیل انعام میمن نے کہا کہ ہمارا مقصد اپنے حلقے کو ایک مثالی حلقہ بنانا ہے جہاں عوام کو ہر ممکن سہولت فراہم کی جا سکے۔ انہوں نے کہا کہ عوامی خدمت ہی ہماری اولین ترجیح ہے اور ہم عوام کا اعتماد مزید مضبوط بنائیں گے۔
اجلاس کے دوران شرجیل انعام میمن نے ڈپٹی کمشنر حیدرآباد کو ہدایت کی کہ وہ عوامی مسائل کے حل کے لیے چیئرمینز سے مستقل اجلاس منعقد کریں اور ان کی مکمل معاونت کریں تاکہ عوامی فلاحی منصوبوں کو بروقت مکمل کیا جا سکے۔
Short Link: https://urdu.app.com.pk/urdu/?p=565011
