سندھ طاس معاہدے پر بھارت دہشت گردی کر رہا ہے، مشعال ملک

اسلام آباد۔24اپریل (اے پی پی):حریت رہنمایاسین ملک کی اہلیہ مشعال ملک نے کہا ہے کہ سندھ طاس معاہدے پر بھارت دہشت گردی کر رہا ہے، بھارت کی جانب سے سندھ طاس معاہدہ معطل کرنا انتہائی قابل مذمت ہے، بھارت نے پہلگام فالس فلیگ آپریشن کا خوفناک پلان تیار کیا، پہلگام واقعہ بھارتی خفیہ ایجنسی ’را‘ نے کروایا ہے، مودی سرکار بہانہ بنا کر جنگ چھیڑنا چاہتی ہے،بھارتی اقدام سے خطے کے امن کو خطرہ ہے،بھارت میں مسلمانوں ،سکھوں سمیت کوئی بھی اقلیت محفوظ نہیں، مقبوضہ کشمیر میں انسانی حقوق کی بد ترین خلاف ورزیوں کا سلسلہ جاری ہے، اقوام متحدہ اور عالمی برادری بھارتی ہٹ دھرمیوں پر آواز اٹھائیں۔ جمعرات کو یہاں نیشنل پریس کلب اسلام آباد میں پریس کانفرنس کرتے ہوئے مشعال ملک نے کہا کہ پہلگام واقعہ بھارتی ایجنسی ’را‘ نے کروایا ہے،

اس سے قبل پٹھان کوٹ اوردیگر واقعات بھی انڈین ایجنسیز نے کرائے، جعفر ایکسپریس ہو یا گجرات کے واقعات سب میں بھارت ملوث رہا ہے، انھوں نے کہا کہ بھارت نے بغیر کسی ثبوت کے پاکستان پر الزام عائد کیا۔ بھارت دنیا بھر میں کشمیریوں کو ٹارگٹ کر رہا ہے، بھارت میں مسلمان، سکھوں سمیت کوئی بھی اقلیت محفوظ نہیں۔  انہوں نے کہا کہ کشمیری عوام کے پاس صرف ٹورازم کا شعبہ رہ گیا تھا وہ بھی ان سے چھین لیا گیا، کشمیریوں کی روایت ہے انہوں نے کبھی اپنے مہمانوں اور سیاحوں کو نقصان نہیں پہنچایا، مقبوضہ کشمیر کے  کشمیریوں نے کرفیو کے دوران سیاحوں کو اپنے گھروں میں رکھا، کشمیری خود بھوکے رہے مگر سیاحوں کو کھانا کھلایا،  بھارت کی مودی سرکار ہندوتوا ایجنڈے پر عمل پیرا ہے۔

بھارت کی جانب سے مقبوضہ کشمیر میں انسانی حقوق کی بد ترین خلاف ورزیوں کا سلسلہ جاری ہے۔مقبوضہ کشمیر میں بھارت غیر قانونی اقدامات کا مرتکب ہو رہا ہے،اقوام متحدہ اور عالمی برادری بھارتی ہٹ دھرمیوں پر آواز اٹھائیں۔

Short Link: https://urdu.app.com.pk/urdu/?p=587213