سنگاپور ۔18مئی (اے پی پی):سنگاپور میں پاکستانی ہائی کمیشن میں معرکہ حق کی تاریخی فتح پر افواج پاکستان کی غیر متزلزل جرات اور پاکستانی عوام کے حوصلے کو خراج تحسین پیش کرنے کےلئے یوم تشکر منایا گیا ۔ پاکستانی کمیونٹی کے 60 سے زائد افراد نے تقریب میں شرکت کی اور بہادر پاکستانی فوجیوں کی جرات اور عوام کے جذبہ کو سراہا
۔
اتوار کو یہا ں موصولہ پریس ریلیز کے مطابق اس موقع پر ہائی کمشنر رابعہ شفیق نے اپنے خطاب میں بھارتی افواج کی حالیہ جارحیت کے دوران بہادری سے مادر وطن کا دفاع کرنے پر افواج پاکستان کی بہادری اور قربانیوں کو زبردست خراج تحسین پیش کیا۔ انہوں نے افواج پاکستان کے غیر متزلزل عزم کو سراہتے ہوئے پاکستان کے ردعمل کو بھارت کی بلا اشتعال اور گمراہ کن فوجی مہم جوئی کے خلاف طاقت کا شاندار مظاہرہ قرار دیا۔ ہائی کمشنر نے شرکاء کو آپریشن بنیان مرصوص کی اہمیت اور شاندار کامیابی سے آگاہ کیا جس نے نہ صرف جنوبی ایشیا میں طاقت کا توازن بحال کیا بلکہ قابل اعتماد ڈیٹرنس کو بھی تقویت دی ہے۔ ہائی کمشنر نے حالیہ کشیدگی کے دوران تارکین وطن سمیت پوری قوم کے اتحاد کو سراہا۔ انہوں نے عالمی برادری کے سامنے پاکستان کا مقدمہ موثر انداز میں پیش کرنے اور پاکستان کو بدنام کرنے کے لئے بھارت کے جھوٹے پروپیگنڈے کو بے نقاب کرنے کے لئے پاکستان کی بھرپور سفارتی کوششوں کو اجاگر کیا۔ انہوں نے اس بات پر زور دیا کہ پاکستان پرامن بقائے باہمی کے لئے پرعزم ہے اورصرف اپنے دفاع میں بالغ نظری، تحمل اور منصوبہ بندی کے ساتھ کارروائی کرتا ہے، جس کا ہدف صرف فوجی تنصیبات ہوتی ہیں۔انہوں نے شرکاء کو سندھ طاس معاہدے کو غیر قانونی طور پر معطل کرکے پانی کو ہتھیار بنانے کے بھارت کے مذموم عزائم اور پاک سرزمین پر دہشت گردی کی سرپرستی کرکے پاکستان کو غیر مستحکم کرنے کی کوششوں سے بھی آگاہ کیا۔ انہوں نے کہا کہ بین الاقوامی برادری کو مقبوضہ جموں و کشمیر تنازعہ کے حل کے لئے پاکستان اور بھارت کے ساتھ مل کر کام کرنا چاہئے اور بھارت پر زور دینا چاہئے کہ وہ اقوام متحدہ کی سلامتی کونسل کی متعلقہ قراردادوں کے مطابق تنازعہ کشمیر کے پرامن حل کے لئے اپنے وعدے کی تعمیل کرے۔ کمیونٹی کے ارکان نے خواتین اور بچوں سمیت معصوم شہریوں کو نشانہ بنانے پر بلا اشتعال بھارتی جارحیت کے خلاف پاکستان کی خودمختاری کا بھرپور دفاع کرنے پر افواج پاکستان کا شکریہ ادا کرتے ہوئے فخر کا اظہار کیا۔ تقریب کے اختتام پر شہداء ، مسلح افواج کے جوانوں اور زخمیوں کی جلد صحت یابی کے لیے دعا کی گئی۔
Short Link: https://urdu.app.com.pk/urdu/?p=598444
