حیدرآباد۔15مئی (اے پی پی):انڈین پریمیئر لیگ میں واحد میچ سن رائزرز حیدرآباد اور گجرات ٹائٹنز کی ٹیموں کے مابین (کل )جمعرات راجیو گاندھی انٹرنیشنل سٹیڈیم، حیدرآباد میں کھیلا جائے گا۔ آئی پی ایل کے 17 ویں ایڈیشن کے دلچسپ مقابلوں کا سلسلہ بھارت میں جاری ہے ۔
سن رائزرز حیدرآباد کی ٹیم کو مایہ ناز آسٹریلوی آل رائونڈر پیٹ کمنز لیڈ کر رہے ہیں جبکہ گجرات ٹائٹنز کی ٹیم کو مایہ ناز بلے باز شبمن گل لیڈ کر رہے ہیں۔سن رائزرز حیدرآباد کی ٹیم 12 میچز کھیل چکی ہے جن میں اس کو7میچز میں فتح اور 5 میں شکست ہوئی اور وہ 14 پوائنٹس کے ساتھ ٹیبل پر چوتھے نمبر پر موجود ہے جبکہ گجرات ٹائٹنز کی ٹیم13میچ کھیل چکی ہے جن میں اس کو 5 میچوں میں فتح جبکہ 7میچزمیں شکست ہوئی اور وہ 11 پوائنٹس کے ساتھ ٹیبل پر ساتویں نمبر پر موجود ہے اور وہ لیگ کے ناک آئوٹ مرحلے کے لئے کوالیفائی نہیں کر پائی ہے۔
لیگ میں شامل 10 ٹیمیں ٹائٹل کے حصول کے لئے ایکشن میں ہیں۔ لیگ میں چنائی سپر کنگز کی ٹیم ٹائٹل کے دفاع کے لئے کوشاں ہے ۔ سن رائزرز حیدرآباد اور گجرات ٹائٹنز کی ٹیموں کے درمیان لیگ کے 66ویں میچ میں دلچسپ مقابلے کی توقع ہے۔آئی پی ایل کا ناک آئوٹ مرحلہ 21 مئی کو شروع ہوگاجبکہ فائنل میچ26 مئی کو ایم اے چدمبرم سٹیڈیم ،چنائی میں کھیلا جائے گا۔