اسلام آباد۔17اپریل (اے پی پی):وفاقی وزیربرائےانفارمیشن ٹیکنالوجی و ٹیلی کمیونیکیشن شزہ فاطمہ خواجہ نے کہاہے کہ سوئٹزرلینڈ کے تجربات سے فائدہ اٹھا کر پاکستان کے آئی ٹی شعبے کو تقویت دی جائے گی،ڈیجیٹل معیشت کو فروغ دینے کے لئے باہمی شراکت داری وقت کی ضرورت ہے۔جمعرات کووزارتِ انفارمیشن ٹیکنالوجی و ٹیلی کمیونیکیشن سے جاری بیان کے مطابق پاکستان میں سوئٹزر لینڈ کے سفیر جارج اسٹینر نےوفاقی وزیر شزہ فاطمہ خواجہ سے اہم ملاقات کی۔
ملاقات میں ڈیجیٹل شعبے میں تعاون بڑھانے پر گفتگوکی گئی اور آئی ٹی اور ای-گورننس میں تعاون کی نئی جہتوں پر تبادلہ خیال کیا گیا۔وفاقی وزیر نے کہا کہ ڈیجیٹل پاکستان وژن کے تحت جدید ٹیکنالوجی کو فروغ دینا حکومت کی ترجیح ہے،سوئٹزرلینڈ کے تجربات سے فائدہ اٹھا کر پاکستان کے آئی ٹی شعبے کو تقویت دی جائے گی۔انہوں نے کہا کہ ڈیجیٹل معیشت کو فروغ دینے کے لئے باہمی شراکت داری وقت کی ضرورت ہے،جدیدٹیکنالوجی اور مہارت بڑھانا حکومت کی ترقی کی ترجیحات میں شامل ہے۔
