اسلام آباد۔29دسمبر (اے پی پی):معروف فلم و ڈرامہ اداکار فردوس جمال نے کہا ہے کہ سوشل میڈیا پر میرے انتقال کی خبروں میں کوئی صداقت نہیں ہے، الحمدللہ ابھی میں زندہ ہوں ،جتنی میری زندگی ہے اتنی میں نے ہرحال میں گذارنی ہے ، وزیراعظم محمد شہباز شریف، وزیراطلاعات مریم اورنگزیب کا شکریہ اداکرتے ہیں ، فنکار کی زندگی کو بچانے کے لئے جو قدم اٹھایا گیا وہ قابل تحسین ہے ۔ بیٹے بازل فردوس کے مطابق معروف فلم و ڈرامہ اداکار فردوس جمال نے اپنے ویڈیو پیغام میں کہا کہ بعض عناصر کی جانب سے میرے انتقال کی خبر دی گئی ہے ان کے لئے میں یہ ویڈیو پیغام جاری کر رہا ہوں کہ میں ابھی زندہ ہوں ، اس لئے آ پ فکر مند نہ ہوں ۔
انہوں نے کہا کہ ریاست پاکستان کی جانب سے جذبہ خیر سگالی کے طور پر وزیراعظم شہباز شریف نے فنکار کی زندگی کو بچانے کے لئے جو قدم اٹھایا ہے وہ احسن قدم ہے ،زندگی اور موت اللہ تعالی کے ہاتھ ہے ،پہلی بار ریاست نے اس سطح پر ایک فنکار کی پذیرائی کی ہے کہ کابینہ کے رکن کو میری پاس بھجوایا گیا اس میں وفاقی وزیر اطلاعات و نشریات کی کاوشیں بھی شامل ہیں ، ان سب کا شکریہ ادا کرتا ہوں ۔اگر کسی جماعت کو محسوس ہورہا ہے کہ انھیں نقصان ہورہا ہے تو اس میں میرا کوئی قصور نہیں ہے، آپ کو میری موت کی خبر نہیں دینی چاہیے تھی ، ہو سکتا ہے کہ میری موت کی خبر آپ کی سیاسی موت ہو ۔
