سوشل میڈیا کے ذریعے منشیات کی سمگلنگ کے روک تھام کے بارے میں شعور اجاگر کرنے کی ضرورت ہے، احسن ظفر بختاوری

اسلام آباد۔4ستمبر (اے پی پی):اسلام آباد چیمبر آف کامرس اینڈ انڈسٹری کے صدر احسن ظفر بختاوری نے کہا ہے کہ سوشل میڈیا کے ذریعے منشیات کی سمگلنگ کے روک تھام کے بارے میں شعور اجاگر کرنے کی ضرورت ہے۔ ان خیالات کا اظہار انہوں نے بدھ کواینٹی نارکوٹکس فورس (اے این ایف) کے زیر اہتمام منشیات کی سمگلنگ کی روم تھام کے حوالے سے منعقدہ آگاہی سیمینار سے خطاب کرتے ہوئے کیا۔

سیمینار میں تاجر برادری کے نمائندوں، پاکستان کسٹمز کے حکام اور دیگر سٹیک ہولڈرز بھی شامل ہوئے۔ ڈائریکٹر جنرل اے این ایف میجر جنرل عبدالمعید نے سمگلروں کی جانب سے نقل و حمل کے لیے استعمال کیے جانے والے جدید ترین طریقوں سے آگاہ کیا جو نہ صرف نوجوانوں کو نقصان پہنچاتے ہیں بلکہ ملک کے امیج کو بھی داغدار کرتے ہیں۔ انہوں نے ملوث افراد کو انصاف کے کٹہرے میں لا کر اس لعنت کو ختم کرنے کے عزم کا اظہار کیا۔

اے این ایف کے سربراہ نے پلانٹ بیسڈ سے کیمیکل بیسڈ ادویات کی طرف تبدیلی پر روشنی ڈالی جس کی وجہ سے نقل و حمل کے لیے نئی تکنیکیں سامنے آئی ہیں۔ انہوں نے یقین دلایا کہ اے این ایف ملک کی ترقی اور خوشحالی کے لیے کاروباری برادری کو ملکی برآمدات بڑھانے میں مکمل سہولت فراہم کرے گی۔

احسن ظفر بختاوری نے اے این ایف کے اقدام کو سراہتے ہوئے سوشل میڈیا مہم کے ذریعے منشیات کی سمگلنگ کے اثرات کے بارے میں شعور اجاگر کرنے کی ضرورت پر زور دیا۔ انہوں نے یقین دلایا کہ تاجر برادری اس لعنت سے نمٹنے کے لیے کوششوں کی حمایت جاری رکھے گی جس سے بالآخر برآمدات میں اضافہ ہوگا، کاروباری برادری اور ملکی معیشت دونوں کو فائدہ ہوگا۔انہوں نے کہا کہ اپنی آنے والی نسلوں کی خاطر سب کو پوری قوت اور عزم کے ساتھ اس لعنت کے خلاف لڑنا ہوگا۔