اسلام آباد۔7جولائی (اے پی پی):سویڈن اسلام آباد میں ویزا سروسز دوبارہ کھولے گا۔ ترجمان دفتر خارجہ کی جانب سے پیر کو جاری بیان کے مطابق 2 جولائی کو سٹاک ہوم میں پاکستان اور سویڈن کی وزارت خارجہ کے درمیان ہونے والے دوطرفہ سیاسی مشاورت کے بعد سویڈن کی حکومت نے اسلام آباد میں ویزا سروسز دوبارہ شروع کرنے کا اعلان کیا ہے۔
ترجمان نے کہا کہ اس سے پاکستانیوں کو مختصر قیام کے لیے سویڈن جانے کی سہولت ملے گی۔ 7 جولائی 2025ء سے موثر پاکستانی شہری 90 دن تک کے سویڈن کے دوروں کے لیے پاکستان سے شینگن ویزا کے لیے درخواست دے سکتے ہیں۔ ترجمان نے کہا کہ پاکستان اس مثبت پیش رفت کا خیرمقدم کرتا ہے جو دونوں ممالک کے درمیان دوطرفہ تعلقات کی مضبوطی کی عکاسی کرتا ہے۔
انہوں نے کہا کہ سٹاک ہوم میں دوطرفہ مشاورت میں پاکستانی وفد کی قیادت ایڈیشنل سیکرٹری خارجہ (یورپ) نے کی جبکہ سویڈن کی طرف سے سویڈش وزارت خارجہ کے ڈائریکٹر جنرل برائے عالمی امور نے کی۔
