لاہور۔13اپریل (اے پی پی):سٹیج اور ٹی وی کے معروف اداکار و کامیڈین جاوید کوڈو 63 برس کی عمر میں لاہور میں انتقال کر گئے۔ ان کی نماز جنازہ سنگھ پورہ پرانی منڈی گرائونڈ لاہورمیں ادا کی گئی۔سینئر اداکار جواد وسیم نے مرحوم جاوید کوڈو کی نماز جنازہ پڑھائی، جنازے میں سہیل احمد عرف عزیزی، نسیم وکی، افضل خان عرف جان ریمبو، نوید انجم، کاشف محمود، شکیل چن، عابد شاہ سمیت تھیٹرز اور ٹیلی ویژن کے اداکاروں سمیت عوام کی کثیر تعداد نے شرکت کی۔اس موقع پر نامور اداکاروں نے مرحوم کے بیٹوں سلمان اور طیب کے ساتھ اظہار تعزیت کیا۔ بعد ازاں انہیں مقامی قبرستان میں سپردخاک کر دیا گیا۔اہل خانہ کے مطابق جاوید کوڈو طویل عرصے سے علیل اور جنرل ہسپتال لاہور میں زیر علاج تھے۔
اداکار جاوید کوڈو نے سوگواران میں بیوہ، دوبیٹے اور ایک بیٹی چھوڑی ہے۔جاوید کوڈو نے 1980کی دہائی میں اپنے فنی سفر کا آغاز کیا اور اپنی منفرد اداکاری، مزاحیہ انداز اور چھوٹے قد کی وجہ سے جلد ہی عوام میں مقبولیت حاصل کر لی، انہوں نے 150 سے زائد اردو و پنجابی فلموں، سینکڑوں سٹیج ڈراموں اور ٹی وی شوز میں اپنی صلاحیتوں کے جوہر دکھائے۔وزیر اعلی پنجاب مریم نواز شریف نے منفرد اداکار جاوید کوڈو کے انتقال پر اظہار افسوس کرتے ہوئے سوگوار خاندان سے دلی ہمدردی و اظہار تعزیت کیا ہے۔جاوید کوڈو کے انتقال پر فلم، ٹی وی اور سٹیج سے وابستہ فنکاروں نے گہرے رنج و غم کا اظہار کیا اور انکی خدمات کو خراج تحسین پیش کیا ہے۔
Short Link: https://urdu.app.com.pk/urdu/?p=581391
