سٹیٹ بنک نے’’راست‘‘ میں شرکت کے پیمانے جاری کردیے

اسلام آباد۔22فروری (اے پی پی):سٹیٹ بنک آف پاکستان نے’’راست‘‘ میں شرکت کے پیمانے جاری کردیے جس کے ذریعے ڈجیٹل ادائیگیوں کو فروغ حاصل ہوا ہے اور ادائیگیوں کی مارکیٹ میں اختراع اور مسابقت کی حوصلہ افزائی ہوئی ہے۔

ہفتہ کو یہاں جاری پریس ریلیز کے مطابق بنک دولت پاکستان نے راست میں شراکت داری کا طریقہ کار وضع کردیا جس کے تحت راست شراکت دار بننے کے خواہشمند ادارے جو راست کے ذریعے صارفین کو ڈجیٹل ادائیگی کی سہولتیں فراہم کرنے کی ضروری وظائفی اور تکنیکی صلاحیتیں رکھتے ہوں کے لئے کم از کم شرائط رکھی گئی ہیں۔

راست فوری ادائیگی کا اعلیٰ فنی نظام ہے یعنی ’’فوری ادائیگی ،پل بھر میں ملک بھر میں‘‘جو سٹیٹ بنک آف پاکستان نے 2021 میں ملک بھر میں رقوم کے فوری، محفوظ اور مؤثر تبادلے کو آسان بنانے کے لیے شروع کیا۔ راست میں بڑی رقوم کی ادائیگیوں کی سہولت، فرد تا فرد (پی ٹو پی)منتقلی، فرد تا تاجر (پی ٹو ایم ) ادائیگیوں کی سہولتیں دستیاب ہیں۔

اپنے آغاز سے اب تک سٹیٹ بنک کے ماتحت آنے والے اداروں اور حکومتی اداروں سمیت 44 ادارے راست میں بطور شراکت دار شامل ہوچکے ہیں جس سے شراکت داروں کی تعداد کافی بڑھ گئی ہے، ڈجیٹل ادائیگیوں کو فروغ ملا ہے اور ادائیگیوں کی مارکیٹ میں اختراع اور مسابقت کی حوصلہ افزائی ہوئی ہے۔مزید تفصیلات اس لنک پر دستیاب ہیں

Short Link: https://urdu.app.com.pk/urdu/?p=564683